पंढरपूर विहीर दुर्घटना: चार कामगार अडकले, बचावकार्य सुरू

सोलापूर जिल्ह्याच्या पंढरपूर तालुक्यातील आंबे गावात रविवारी विहीर खोदण्याचे काम सुरू असताना अचानक विहीर कोसळली. माती आणि दगडांचा मोठा ढिगारा काम करत असलेल्या कामगारांच्या अंगावर पडला. या दुर्घटनेत चार कामगार मातीच्या ढिगाऱ्याखाली अडकले आहेत. घटनेनंतर लगेचच बचावकार्य सुरू करण्यात आले असून, सात तासांपासून ते अखंडपणे सुरू आहे.

शेतात विहीर खोदताना काय घडलं

आंबे येथील शेतकरी निवास शिंदे यांच्या शेतात विहीर खोदण्याचे काम सुरू होते. काम सुरू असताना अचानक दगड-मातीचा ढिगारा कोसळला आणि तेथे काम करणाऱ्या कामगारांना बाहेर पडण्याची संधीच मिळाली नाही. चारही कामगार ढिगाऱ्याखाली अडकले आहेत. त्यांना सुखरूप बाहेर काढण्यासाठी प्रशासनाचे प्रयत्न सुरू आहेत.

सोलापूरचे जिल्हाधिकारी आणि जिल्हा दंडाधिकारी एस. कार्तिकेयन स्वतः घटनास्थळी उपस्थित राहून बचावकार्यावर लक्ष ठेवून आहेत. माढ्याचे आमदार अभिजीत पाटीलही घटनास्थळी आहेत. लवकरच एनडीआरएफचे पथकही तेथे दाखल होणार असल्याची माहिती जिल्हाधिकाऱ्यांनी दिली आहे. सर्व कामगार सुखरूप असावेत, अशी भावना आमदार पाटील यांनी व्यक्त केली आहे.

बचाव सुरू असतानाच श्रद्धांजली, नंतर पोस्ट डिलीट

एकीकडे कामगारांना जिवंत वाचवण्याचे प्रशासनाचे प्रयत्न सुरू असताना दुसरीकडे जिल्ह्याचे पालकमंत्री जयकुमार गोरे यांच्यासह काही भाजप नेत्यांनी कामगारांच्या मृत्यूची घोषणा करत सोशल मीडियावर श्रद्धांजली वाहिली. माजी आमदार प्रशांत परिचारक, भाजप तालुका अध्यक्ष सुभाष मस्के, माऊली हळनवर आणि इतर पदाधिकाऱ्यांनीही श्रद्धांजलीच्या पोस्ट केल्या. मात्र चूक लक्षात आल्यानंतर पालकमंत्री जयकुमार गोरे यांनी आपली पोस्ट डिलीट केली. बचावकार्य अद्याप सुरू आहे.