केंद्रीय गृहमंत्री अमित शाह यांनी पुण्यातील एका कार्यक्रमात सहकार क्षेत्राच्या विकासाचा मुद्दा मांडतानाच काँग्रेस आणि राहुल गांधी यांच्यावर जोरदार टीका केली. महाराष्ट्र ही सहकार चळवळीची सुरुवात करणारी भूमी असून, येथूनच सहकार क्षेत्राला नवी दिशा मिळत असल्याचे त्यांनी सांगितले.
सहकार क्षेत्रासाठी मोठ्या घोषणा
पंतप्रधान नरेंद्र मोदी यांनी ७० वर्षांनंतर केंद्रात स्वतंत्र सहकार मंत्रालय स्थापन केल्याचे शाह म्हणाले. काँग्रेसच्या काळात शेतकरी स्वतंत्र सहकार मंत्रालयाची मागणी करत होते, मात्र ती मान्य झाली नव्हती. काँग्रेसच्या काळात अनेक साखर कारखाने बंद पडले; ते पुन्हा सुरू करण्याचे प्रयत्न सुरू आहेत.
सुमारे ११० एकर जागेत उभारण्यात येणाऱ्या प्रकल्पातून डेअरी आणि साखर कारखान्यांसाठी लागणारी यंत्रसामग्री देशातच तयार केली जाणार असून, हा प्रकल्प २०२९ पर्यंत सुरू करण्याचे नियोजन आहे. रेल्वे आणि संरक्षण क्षेत्रासाठी लागणारे कंटेनरही तेथे तयार करण्याचे नियोजन असल्याचे त्यांनी स्पष्ट केले.
देशभरात भारत टॅक्सी सेवा सुरू करण्याचे नियोजन असल्याचेही शाह यांनी सांगितले. खासगी टॅक्सी कंपन्यांकडून चालकांचे शोषण होत असल्याचा आरोप त्यांनी केला. सहकाराच्या माध्यमातून चालकांना अधिक सक्षम करण्याचा सरकारचा प्रयत्न आहे. पुण्यातील कार्यक्रमात भारत टॅक्सी सेवेचा प्रारंभ आणि सहकारी संस्थांच्या पश्चिम विभागीय कार्यालयाचे उद्घाटनही नियोजित होते.
राहुल गांधींवर निशाणा
यानंतर शाह यांनी काँग्रेस आणि राहुल गांधी यांच्यावर निशाणा साधला. काँग्रेसला तीन वेळा पराभवाला सामोरे जावे लागल्याने पक्षाकडून सरकारवर टीका केली जात असल्याचे ते म्हणाले. राहुल गांधी यांनी परदेशात जाऊन भारतविरोधी विचार मांडले आणि देशाची प्रतिमा मलिन करण्याचा प्रयत्न केला, असा आरोप शाह यांनी केला.
काँग्रेसच्या काळात मोठमोठे घोटाळे झाले, मात्र नरेंद्र मोदी यांच्या नेतृत्वाखालील सरकारच्या १२ वर्षांच्या काळात चार आण्याचाही भ्रष्टाचार झाल्याचा आरोप विरोधक करू शकले नाहीत, असा दावाही त्यांनी केला. राहुल गांधी यांना सल्ला देताना शाह म्हणाले, भारताला बदनाम करून सत्ता मिळणार नाही. विदेशी दौरे बंद करून गावागावात फिरा, तर कधीतरी तुमचा नंबर लागेल. पंतप्रधान मोदी आणि भारताची प्रतिमा खराब करून सत्तेची आकांक्षा पूर्ण होऊ शकत नाही, असेही त्यांनी स्पष्ट केले.
Leave a Reply