जम्मू-काश्मीरमधील कुलगाम जिल्ह्यात गेल्या आठवड्यात केंद्रीय राखीव पोलिस दलाच्या चौकीवर झालेल्या हल्ल्यामागील दहशतवाद्यांची ओळख पटवण्यासाठी सुरक्षा दलांच्या हाती महत्त्वाचे धागेदोरे लागले आहेत. या दहशतवाद्यांचा शोध घेण्यासाठी प्रयत्न सुरू असल्याची माहिती निमलष्करी दलाच्या वरिष्ठ अधिकाऱ्याने सोमवारी दिली.
कारवाई सुरू, तपशील गोपनीय
‘आमची कारवाई सुरू आहे. मात्र गोपनीयतेच्या कारणास्तव त्याचे तपशील उघड करू शकत नाही,’ असे जम्मू-काश्मीर विभागाचे सीआरपीएफचे अतिरिक्त महासंचालक संदीप खिरवार यांनी एका कार्यक्रमाच्या पार्श्वभूमीवर पत्रकारांशी बोलताना सांगितले. ११ नोव्हेंबर रोजी कुलगाममधील मीर बाजारजवळ असलेल्या केंद्रीय राखीव पोलिस दलाच्या चौकीवर दोन शस्त्रधारी दहशतवाद्यांनी गोळीबार केला होता. या हल्ल्यात सीआरपीएफचे तीन जवान जखमी झाले होते.
दक्षिण काश्मीरमध्ये शोधमोहीम
हल्लेखोरांपैकी कोणाची ओळख पटली आहे का, या प्रश्नावर खिरवार म्हणाले, ‘आमच्या हाती काही धागेदोरे लागले आहेत. हे धागेदोरे बऱ्यापैकी महत्त्वाचे आहेत.’ दक्षिण काश्मीरमध्ये दहशतवाद्यांचा शोध घेण्यासाठी अनेक ठिकाणी शोधमोहीम सुरू असल्याचेही त्यांनी सांगितले. जखमी जवानाची प्रकृती आता चांगली असल्याचेही त्यांनी सांगितले.
Leave a Reply