राज्यातील राजकीय वर्तुळातून मोठी बातमी समोर येत आहे. शिवसेना शिंदे गटाला मनसेने मोठा धक्का दिला आहे. दक्षिण रत्नागिरीतील छावा संघटना आणि शिवसेना शिंदे गटाच्या पदाधिकाऱ्यांसह कार्यकर्त्यांनी मनसेत प्रवेश केला आहे. त्यामुळे मुंबईसह राज्यातील राजकीय घडामोडींना वेग आला आहे.
लोकसभा निवडणुकीमध्ये राज्यात महाविकास आघाडीला मोठे यश मिळाले होते. मात्र विधानसभा निवडणुकीमध्ये महाविकास आघाडीला हे यश टिकवून ठेवता आले नाही. विधानसभा निवडणुकीत महायुतीने जोरदार पुनरागमन केले आणि राज्यात पुन्हा एकदा महायुतीची सत्ता आली. भाजप हा विधानसभा निवडणुकीमध्ये राज्यात सर्वात मोठा पक्ष ठरला, तर शिवसेना शिंदे गटालाही चांगले यश मिळाले.
विधानसभा निवडणुकीमध्ये मिळालेल्या विजयानंतर महाविकास आघाडीच्या अनेक दिग्गज नेत्यांनी महायुतीमध्ये प्रवेश केला. स्थानिक स्वराज्य संस्थांच्या निवडणुकीवेळी देखील हेच चित्र कायम होते. महाविकास आघाडीला या काळात अनेक धक्के बसले.
दादरमध्ये पक्षप्रवेश सोहळा
काही दिवसांपूर्वीच शिवसेना शिंदे गटाने शिवसेना ठाकरे गटाला मोठा धक्का दिला होता. शिवसेना ठाकरे गटाच्या नऊ खासदारांपैकी सहा खासदारांनी शिवसेना शिंदे गटात प्रवेश केला होता. हा उद्धव ठाकरे यांच्यासाठी मोठा धक्का होता. परंतु आता उलट घडले असून, शिवसेना शिंदे गटाला मनसेने धक्का दिला आहे.
दक्षिण रत्नागिरीतील छावा संघटनेचे जिल्हाध्यक्ष संतोष धावडे यांच्यासह अनेक कार्यकर्त्यांनी मनसेमध्ये पक्षप्रवेश केला आहे. दादरच्या मनसे कार्यालयात अमित ठाकरेंच्या उपस्थितीमध्ये हा पक्षप्रवेश पार पडला. दुसरीकडे शिवसेना शिंदे गटाच्या जवळपास १०० ते १५० पदाधिकारी आणि कार्यकर्त्यांनी देखील मनसेमध्ये प्रवेश केला आहे. हा शिवसेना शिंदे गटासाठी मोठा धक्का मानला जात आहे. या पक्षप्रवेशामुळे आता दक्षिण रत्नागिरीमध्ये मनसेला बळ मिळणार आहे.
मुंबई महापालिकेचा संदर्भ
दरम्यान, गेल्या मुंबई महापालिका निवडणुकीमध्ये मनसेने शिवसेना ठाकरे गटासोबत युती केली होती. परंतु या निवडणुकीमध्ये देखील मनसेला अपेक्षित असे यश मिळू शकले नव्हते. सुरुवातीला शिवसेना ठाकरे गट आणि मनसेकडून भाजप आणि शिवसेना शिंदे गटासमोर मोठे आव्हान निर्माण करण्यात आले, परंतु शेवटी मुंबईमध्ये भाजपचाच महापौर झाला.
Leave a Reply