शेतकऱ्यांसाठी अत्यंत महत्त्वाची बातमी आहे. सरकार दुष्काळामध्ये शेतकऱ्यांना आर्थिक मदत करत आहे. तसेच सरकार विविध योजनांच्या द्वारे शेतकऱ्यांना शेतीच्या कामासाठी आणि दैनंदिन खर्च निघावा म्हणून काही योजना राबवत आहे. पण शेतकऱ्यांना या योजनेचा लाभ घेण्यासाठी ॲग्रीस्टॅक नोंदणी आणि फार्मर आयडी कार्ड अनिवार्य करण्यात आले आहे. मदत आणि पुनर्वसन मंत्री मकरंद जाधव यांनी शेतकऱ्यांना तातडीने ईकेवायसी प्रक्रिया पूर्ण करण्याचे आवाहन केले आहे.
## नोंदणी का आवश्यक आहे?
ॲग्रीस्टॅक योजनेत नोंदणी केली की दिवाळीआधी जाहीर झालेली मदत शेतकऱ्यांच्या खात्यात जमा होणार आहे. तसेच शेतकऱ्यांना विविध योजनांचाही लाभ घेता येईल. नोंदणी नसेल तर सरकारी योजनांचे पैसे अडकू शकतात आणि लाभ घेताना अडचणी येऊ शकतात. त्यामुळे प्रत्येक शेतकऱ्याने आपली नोंदणी आणि ईकेवायसी प्रक्रिया लवकरात लवकर पूर्ण करणे गरजेचे आहे.
## नोंदणी कशी करायची?
ॲग्रीस्टॅक योजनेत नोंदणी करण्यासाठी सर्वप्रथम युनिफाइड फार्मर सर्व्हिस इंटरफेस या अधिकृत संकेतस्थळावर जा. तिथे आधार क्रमांक आणि मोबाईलवर आलेला ओटीपी भरून घ्या. पुढे तुमच्या जमिनीची माहिती भरा. तिथे सातबारा आणि सर्व्हे क्रमांक भरावा लागेल. पुढे महसूल विभागाकडून संबंधित माहितीची तपासणी होते. पडताळणी पूर्ण झाल्यावर डिजिटल किसान आयडी मिळवता येतो.
महत्त्वाचे म्हणजे शेतकऱ्यांचे आधार कार्ड फोन क्रमांकाला लिंक असायला हवे. तसेच जमिनीचे सर्व पुरावे, सातबारा असणेही आवश्यक आहे. ऑनलाइन नोंदणी करणे शक्य नसेल तर जवळच्या सीएससी केंद्रात म्हणजेच नागरी सुविधा केंद्रात जाऊनही नोंदणी करता येते. त्यामुळे भविष्यात कोणत्याही योजनांचा लाभ घेताना अडचणी येणार नाहीत.
Leave a Reply