नाशिकच्या नाट्यपरंपरेला नवा आंतरराष्ट्रीय मान मिळाला आहे. शहरातील निर्मिती आणि कलावंतांचा संघ असलेल्या ‘निकाज कोकोन’ या इंग्रजी नाटकाचा पहिला परदेशी दौरा मार्च २०२७ मध्ये ऑस्ट्रेलियात होणार आहे. ऑस्ट्रेलियातील प्रयोगांसाठी तिकिटांची आगाऊ विक्री सुरू झाली असून, त्याला उत्स्फूर्त प्रतिसाद मिळत आहे. त्यानंतर हे नाटक अमेरिका आणि जगभरातील इतर देशांमध्येही सादर केले जाणार आहे.
## बारा वर्षांच्या मुलीची कथा
विसाव्या शतकातील रशियाच्या पार्श्वभूमीवर बेतलेली ही कथा एका बारा वर्षांच्या मुलीच्या प्रवासाभोवती फिरते. ती शाळेत जाण्याऐवजी विटांच्या कारखान्यात काम करते. पुढे लिओ टॉल्स्टॉय यांच्या समुदायात गेल्यानंतर तिला मैत्री, शिक्षण, सर्जनशीलता आणि स्वातंत्र्याने भरलेले एक वेगळे जग गवसते. या नाटकाचे लेखन पुण्याच्या हिमानी नीलेश यांनी केले असून, नाशिकचे नाट्य दिग्दर्शक जयेश आपटे यांच्या रावी प्रॉडक्शन आणि स्टेज क्राफ्ट यांच्या संयुक्त विद्यमाने हे प्रयोग सादर केले जाणार आहेत.
## ‘अभिनाट्य’ शैलीचा नवा प्रयोग
या नाटकात ‘अभिनाट्य’ म्हणजेच अभिनय आणि नाट्य शैलीची संकल्पना राबवली जात आहे. नाटक, नृत्य किंवा चित्रपटातून आशय आणि भावना थेट प्रेक्षकांपर्यंत पोहोचवण्याची ही एक विशिष्ट कलात्मक पद्धत आहे. परदेशात इंग्रजी नाटक सादर करण्याचा हा पहिलाच अनुभव असून, सध्या कलावंतांचा संघ ऑनलाइन पद्धतीने सराव करत आहे. नाशिकच्या कलाकारांच्या या आंतरराष्ट्रीय झेपमुळे जागतिक स्तरावर मराठी नाट्यनिर्मितीचा आणि कलागुणांचा दबदबा पुन्हा एकदा अधोरेखित झाला आहे, असा विश्वास दिग्दर्शक जयेश आपटे यांनी व्यक्त केला आहे.
Leave a Reply