दोन तरुण अधिकारी, एकाच प्रशिक्षण संस्थेत झालेली भेट, मैत्रीतून उमललेले प्रेम आणि आता विवाह — हरियाणा केडरचे आयएएस अधिकारी विवेक आर्य आणि आयपीएस अधिकारी अदिती सिंग यांची ही कहाणी सध्या सर्वत्र चर्चेत आहे. दोघेही उद्या, रविवारी १५ नोव्हेंबर रोजी विवाहबंधनात अडकणार आहेत. त्यांचा विवाहसोहळा हरियाणातील पंचकुला येथे पार पडणार आहे.
विवेक हे अतिरिक्त पोलिस उपआयुक्त म्हणून कार्यरत आहेत, तर अदिती या पोलिस उपआयुक्त आहेत. या दोघांच्या लग्नाची बातमी समोर येताच त्यांच्या प्रेमकहाणीबद्दल लोकांमध्ये उत्सुकता वाढली आहे. दोघेही सध्या पंचकुलामध्ये कार्यरत आहेत.
मसुरीत भेट, मैत्रीतून प्रेम
विवेक आणि अदिती यांची भेट मसुरीमध्ये झाली. मसुरीतील लाल बहादूर शास्त्री राष्ट्रीय प्रशासन अकादमीमध्ये दोघेही प्रशिक्षण घेत होते. प्रशिक्षणाच्या काळात त्यांच्यात मैत्रीचे नाते तयार झाले आणि याच काळात त्यांच्यात प्रेमही जुळले. त्यानंतर दोघांनी लग्नाचा निर्णय घेतला.
अदिती या मूळच्या उत्तर प्रदेशातील मेरठच्या आहेत. सध्या त्या हिमाचल प्रदेश केडरमधील आयपीएस अधिकारी आहेत. त्यांनी २०२० मध्ये यूपीएससी परीक्षेत ५४ वा क्रमांक मिळवला होता. आधी त्यांची एसडीएम म्हणून नियुक्ती झाली होती, त्यानंतर त्यांनी भारतीय पोलिस सेवेत जाण्याचा निर्णय घेतला. सुरुवातीला त्यांना हिमाचल प्रदेश केडर देण्यात आले होते, मात्र विवेक यांच्याशी लग्नाच्या निर्णयानंतर आता त्यांना हरियाणा केडर देण्यात आले आहे. त्यामुळे दोघांनाही आता एकच केडर मिळाले आहे.
विवेक यांचा अधिकारी होण्यापर्यंतचा प्रवास
विवेक आर्य यांचा अधिकारी बनण्यापर्यंतचा प्रवास सोपा नव्हता. त्यांनी सरकारी शाळेत शिक्षण घेतले. बारावीपर्यंतचे शिक्षण त्यांनी कुंजपुरा येथील सैनिक स्कूलमधून पूर्ण केले. त्यानंतर चंदीगढमध्ये पुढचे शिक्षण घेत त्यांनी यूपीएससी परीक्षेत १३१ वा क्रमांक मिळवून अधिकारीपद मिळवले.
लग्नापूर्वी काल संध्याकाळी भादरा येथे स्वागत समारंभ आयोजित करण्यात आला होता. या समारंभाला अनेक राजकीय नेते, आयपीएस अधिकारी आणि एचसीएस अधिकाऱ्यांनी हजेरी लावली होती. लग्नाला कोण कोण उपस्थित राहणार याबद्दलही उत्सुकता आहे.
स्रोत: मूळ बातमी
Leave a Reply