पुनर्विकासाच्या माध्यमातून नवी मुंबई शहराचा झपाट्याने विस्तार होत आहे. शहरात ३२ ते ४० मजली टोलेजंग इमारतींची संख्या वेगाने वाढत असताना, अशा उंच इमारतींना आग लागल्यास ती विझवणे आणि वरच्या मजल्यांवर अडकलेल्या नागरिकांची सुरक्षित सुटका करणे हे अग्निशमन दलासमोर मोठे आव्हान ठरत आहे.
शिडीची उंची ६८ मीटर, इमारती ४० मजली
नवी मुंबई महापालिकेच्या अग्निशमन दलाच्या ताफ्यात मागील वर्षी अत्याधुनिक मॅगिरस मॉडेलचे टर्नटेबल लॅडर अर्थात शिडीचे वाहन दाखल झाले आहे. या वाहनाची कार्यक्षम उंची ६८ मीटर, म्हणजेच सुमारे २२३ फूट आहे. साधारण २३ ते २५ मजल्यांपर्यंतच्या इमारतींमध्ये आग विझवण्यासाठी आणि आपत्कालीन परिस्थितीत नागरिकांची सुटका करण्यासाठी हे वाहन उपयुक्त ठरते. मात्र पालिका प्रशासनाकडून ३२ ते ४० मजली इमारतींना बांधकाम परवानगी दिली जात असताना, शिडीची कार्यक्षम उंची आणि इमारतींची उंची यामध्ये तफावत निर्माण होण्याची शक्यता आहे. वरच्या मजल्यांवर आग लागल्यास कोणत्या यंत्रणेच्या माध्यमातून नियंत्रण मिळवावे, हा महत्त्वाचा प्रश्न आहे.
दिवाळीत चार दिवसांत आगीच्या ९० घटना
नुकत्याच झालेल्या दिवाळीच्या काळात अवघ्या चार दिवसांत नवी मुंबईत आगीच्या ९० घटना घडल्या. ठाण्यातील रहेजा गार्डन परिसरात लागलेली आग विझवतानाही अग्निशमन दलाला मोठी कसरत करावी लागली. त्यामुळे वाढत्या उंच इमारतींच्या पार्श्वभूमीवर अग्निसुरक्षेचा मुद्दा पुन्हा ऐरणीवर आला आहे.
अंतर्गत अग्निसुरक्षा यंत्रणा सक्षम असणे गरजेचे
उंच इमारतींमध्ये आग लागल्यास केवळ शिडीच्या वाहनावर अवलंबून राहणे पुरेसे ठरणार नाही. इमारतींमधील अग्निसुरक्षा यंत्रणा, फायर लिफ्ट, स्वतंत्र अग्निशमन जलसाठा, अंतर्गत पाइपलाइन, स्प्रिंकलर यंत्रणा आणि आपत्कालीन बाहेर पडण्याचे मार्ग सक्षम असणे आवश्यक आहे. त्याचबरोबर अग्निशमन दलाकडे पुरेसे मनुष्यबळ, आधुनिक उपकरणे आणि नियमित आपत्कालीन सराव असणेही तितकेच गरजेचे आहे. दुसऱ्या टर्नटेबल लॅडरचे काम सुरू असून त्याची क्षमताही ६८ मीटर आहे. शहरातील वाढत्या उंच इमारती लक्षात घेता अधिक उंचीच्या टर्नटेबल लॅडरचा ताफ्यात समावेश करण्याच्या दृष्टीने प्रस्ताव तयार करण्यात आला आहे, असे अग्निशमन दलाचे केंद्रप्रमुख पुरुषोत्तम जाधव यांनी सांगितले.
स्रोत: मूळ बातमी
Leave a Reply