नांदगाव शहरासह परिसरातील ५६ गावांना पाणीटंचाईच्या तीव्र झळा बसत असताना, खासगी टेलिफोन कंपनीच्या कामातील निष्काळजीपणामुळे शहराला पाणीपुरवठा करणारी मुख्य जलवाहिनी फुटली. त्यामुळे हजारो लिटर पिण्यायोग्य पाणी वाया गेले असून, शहरातील मुख्य बाजारपेठ, हनुमाननगर, साकोरा रस्ता आणि येवला रस्ता परिसरातील पाणीपुरवठा पूर्णपणे विस्कळीत झाला आहे. ऐन दिवाळीच्या काळात घडलेल्या या प्रकारामुळे नागरिकांमध्ये तीव्र संताप आहे.
शहरात गेल्या महिनाभरापासून खासगी टेलिफोन कंपन्यांकडून भूमिगत केबल टाकण्यासाठी विविध ठिकाणी खोदकाम आणि एचडीडी ड्रिलिंगची कामे सुरू आहेत. मात्र, जमिनीखालील मुख्य जलवाहिन्यांची कोणतीही खात्री किंवा पुरेशी माहिती न घेता हे काम केले जात असल्याने जलवाहिन्या फुटण्याचे प्रकार वारंवार घडत आहेत. याच निष्काळजीपणामुळे नांदगाव शहरासह परिसराला पाणीपुरवठा करणारी मुख्य जलवाहिनी फुटली.
दिवाळीत पाण्यासाठी हेळसांड
दिवाळीच्या सणात घरांची साफसफाई, सणाची तयारी आणि दैनंदिन वापरासाठी पाण्याची अत्यंत आवश्यकता असताना नळांना पाणी न आल्याने नागरिकांची, विशेषतः महिलांची मोठी हेळसांड झाली. आधीच पाणीटंचाईचा सामना करणाऱ्या नागरिकांना या प्रकारामुळे नाहक मनस्ताप सहन करावा लागला.
महिनाभरापासून वारंवार गळती
गेल्या तीस दिवसांपासून येथील जलवाहिन्या कोणत्या ना कोणत्या कारणांमुळे सतत खंडित होत आहेत. कधी गिरणा धरणातील उद्भव विहिरीवरील उपसा पंप, तर कधी न्यू पांझण येथील जलशुद्धीकरण केंद्रातील उपसा पंप नादुरुस्त होणे, सांधे उखडून जलवाहिन्या फुटणे असे प्रकार वाढले आहेत. वारंवार जलवाहिन्या नादुरुस्त होणे आणि लाखो लिटर पाणी वाया जाणे, या तांत्रिक दोषांची नेमकी जबाबदारी कोणाची, असा संतप्त सवाल नागरिक विचारत आहेत.
गिरणानगर, श्रीरामनगर, मल्हारवाडी आदी शहरालगतच्या ग्रामीण हद्दीतील नागरी वसाहतींना गेल्या महिनाभरापासून पिण्याचे पाणी मिळालेले नाही. जिल्हा परिषदेची देखभाल-दुरुस्ती करणारी यंत्रणा याप्रकरणी पूर्णपणे हतबल झाली असून, पाईपलाईन लिकेजची जुनीच सबब पुढे करून जनतेचा रोष कमी करण्याचा प्रयत्न होत असल्याचा आरोप नागरिकांनी केला आहे. ५६ गावांची अशी दुरावस्था झाली असूनही जिल्हा परिषदेच्या वरिष्ठ यंत्रणेने कुठल्याही प्रकारची नोंद घेतलेली नाही. त्यामुळे वारंवार खराब होणाऱ्या या वाहिनीची शासनाने दुष्काळी निधीतून देखभाल आणि दुरुस्ती करावी, अशी मागणी नांदगावचे ॲड. उमेशकुमार सरोदे पाटील यांनी केली आहे.
स्रोत: मूळ बातमी
Leave a Reply