इगतपुरी तालुक्यातील कुरुंगवाडी येथे संविधान बचाव अभियानांतर्गत चौपाल ग्रामसभा घेण्यात आली. या ग्रामसभेत मार्गदर्शन करताना काँग्रेस प्रदेशाध्यक्ष हर्षवर्धन सपकाळ यांनी एसआयआरच्या माध्यमातून मतदारांची नावे वगळली जात असल्याचा आरोप केला. त्यांच्या मते, दुर्गम आदिवासी आणि शहरी भागासह गावागावात मतदारांची नावे वगळून मतदारांच्या हक्कावर गदा आणली जात आहे.
वगळलेले नागरिक त्याच गावचे मूळ रहिवासी असून त्यांचा जन्म त्याच मातीत झाला आहे, तरीही त्यांची नावे वगळण्यात आली आहेत, असे सपकाळ म्हणाले. गावातील २० टक्के मतदान परस्पर कमी करणे हाच एसआयआरचा खरा आणि घातक चेहरा असल्याचे त्यांनी सांगितले.
ग्रामसभेत एकमुखी ठराव
या अन्यायाविरोधात वोट चोर, गद्दी छोड आणि संविधान बचाव अभियानाच्या माध्यमातून कुरुंगवाडी येथे ग्रामसभा पार पडली. या अभियानात पूर्ण ताकदीने सहभागी होण्याचा एकमुखी ठराव ग्रामस्थांनी केला असून संपूर्ण गाव काँग्रेसच्या पाठीशी ठामपणे उभे असल्याचे सांगण्यात आले.
सभेला महाराष्ट्र प्रभारी सिरीवेला प्रसाद आणि सहप्रभारी बी. एम. संदीप उपस्थित होते. काँग्रेस नेते लकी जाधव, तालुकाध्यक्ष रामदास धांडे आणि जिल्हा सरचिटणीस आकाश पारख यांनी संयोजन केले. सरपंच गोपाळ सावंत, पिंटू सावंत आणि शंकर सावंत यांनी ग्रामस्थांच्या भावना मांडल्या. प्रदेश नेते राजाराम पानगव्हाणे आणि जिल्हाध्यक्ष भारत टाकेकर आदी उपस्थित होते.
भाजपवर टीका करताना सपकाळ म्हणाले की, देशातील नागरिकांचे हक्क आणि स्वातंत्र्य हिरावून घेऊन त्यांना पुन्हा एकदा गुलाम बनवण्याचे मोठे षड्यंत्र रचले जात आहे. देशाची संपत्ती आणि जमिनी उद्योगपतींच्या घशात घातल्या जात आहेत, तसेच आदिवासींची मूलनिवासी ओळख पुसून टाकण्याचा आणि त्यांची संस्कृती नष्ट करण्याचा प्रयत्न सुरू असल्याचा आरोप त्यांनी केला.
स्रोत: मूळ बातमी
Leave a Reply