इगतपुरी : सर्वतीर्थ टाकेद बुद्रुक येथे चोरट्यांनी कृषी पंप विक्री व दुरुस्तीच्या दुकानाचे शटर तोडून तब्बल ४९ हजार रुपयांचा मुद्देमाल लंपास केला. घोटी पोलिसात चोरट्यांविरुद्ध गुन्हा दाखल करण्यात आला आहे. या घटनेमुळे परिसरातील नागरिकांत भीतीचे वातावरण पसरले आहे.
टाकेद बुद्रुक येथील रहिवासी सागर रमाकांत खोल्लम (३०) यांचे सर्वतीर्थ रस्त्यासमोर ‘भाग्यश्री मोटर्स’ नावाचे शेतीपंप विक्री व रिपेरिंगचे दुकान आहे. सकाळी सहाच्या सुमारास ते दुकान उघडण्यासाठी आले असता, शटरच्या कुलपाजवळ वाळू पडलेली व दोन्ही बाजूच्या लॉक पट्ट्या तुटलेल्या अवस्थेत दिसून आल्या. खोल्लम यांनी तात्काळ वडील रमाकांत खोल्लम व शेजारील दुकानदारांच्या मदतीने शटर उघडून पाहिले असता, दुकानातील साहित्य अस्ताव्यस्त पडलेले आणि चोरीला गेल्याचे निदर्शनास आले. दुकानाच्या भिंतीजवळ वायरचे रिकामे बॉक्स पडलेले आढळले. सागर खोल्लम यांनी पोलिसात दिलेल्या फिर्यादीनुसार गुन्हा दाखल झाला आहे.
सकाळी दुकान उघडताना चोरी उघडकीस
फिर्यादीच्या म्हणण्यानुसार अंदाजे पाच लाख रुपयांच्या वस्तूंची चोरी झाल्याचा अंदाज वर्तविण्यात येत आहे. सुरुवातीच्या माहितीत ४९ हजार रुपयांचा मुद्देमाल लंपास झाल्याचे सांगण्यात आले होते. चोरीला गेलेल्या वस्तूंची नेमकी किंमत किती, याचा तपास पोलीस करत आहेत.
परिसरात भीतीचे वातावरण
सर्रासपणे होणाऱ्या टाकेद परिसरातील वाढते चोरीचे प्रमाण व वाढती गुन्हेगारीवर घोटी पोलिसांकडून त्वरित नियंत्रण आणण्यात यावे अशी मागणी संपूर्ण परिसरातील नागरिकांकडून होत आहे. अज्ञात चोरट्यांचा शोध घेण्याचे काम पोलिसांकडून सुरू असल्याचे सांगण्यात येत आहे.
स्रोत: मूळ बातमी
Leave a Reply