दोन्ही राष्ट्रवादी गटांचं विलिनीकरण हीच अजित पवार यांना खरी श्रद्धांजली ठरेल, असं मत राष्ट्रवादीचे माजी आमदार अमोल मिटकरी यांनी व्यक्त केलं आहे. त्यामुळे येत्या २८ जानेवारीला अजित पवारांच्या पहिल्या स्मृतिदिनाआधी त्यांचं एकत्रीकरणाचं स्वप्न पूर्ण व्हावं, अशी इच्छा त्यांनी अकोला येथे बोलताना व्यक्त केली. गेल्या काही दिवसांपासून सुरू असलेल्या राष्ट्रवादीच्या विलिनीकरणाच्या चर्चेला यामुळे आणखी हवा मिळाली आहे.
श्रद्धांजली म्हणून विलिनीकरण
अमोल मिटकरी यांनी सातत्याने अजित पवारांच्या निधनाच्या चौकशीची मागणी केली असून, हा घातपात असल्याचा संशयही त्यांनी व्यक्त केला आहे. आता विलिनीकरणाच्या मुद्द्यावर त्यांनी आपली भूमिका मांडली आहे. दोन्ही राष्ट्रवादींचं विलिनीकरण हीच अजितदादांना खरी श्रद्धांजली ठरणार आहे, त्यामुळे २८ जानेवारीला दादांच्या पहिल्या स्मृतिदिनाआधी दादांचं एकत्रीकरणाचं स्वप्न पूर्ण व्हावं, अशी इच्छा त्यांनी व्यक्त केली. दरम्यान, महाराष्ट्राला लवकरच ‘गुड न्यूज’ मिळेल, असंही ते म्हणाले. विलिनीकरणाच्या निर्णयासंदर्भात संपूर्ण पक्ष सुनेत्रा पवार यांच्या पाठीशी खंबीर असल्याचं त्यांनी सांगितलं. सुनेत्रा वहिनी म्हणतील तेच पक्षाचं धोरण आणि त्या बांधतील तेच तोरण, असं सर्वसामान्य कार्यकर्त्यांचं मत असल्याचंही त्यांनी म्हटलं. विलिनीकरणावर सूचक वक्तव्य करताना मिटकरी यांनी ‘आगे आगे देखीये, होता है क्या’ असं म्हटलं.
चर्चेला वेग कसा आला
राज्यात पुन्हा एकदा दोन्ही राष्ट्रवादीच्या विलिनीकरणाची चर्चा जोरदारपणे सुरू आहे. यापूर्वी खासदार तथा शरद पवारांच्या राष्ट्रवादीच्या नेत्या सुप्रिया सुळे यांनी विलिनीकरणाची चर्चा आपल्याकडून तरी संपुष्टात आल्याचं म्हटलं होतं. मात्र गेल्या काही दिवसांपासून शरद पवारांसोबत सुरू असलेल्या भेटीगाठी आणि केंद्रीय गृहमंत्री अमित शाह यांच्यासमवेत झालेल्या चर्चेनंतर राष्ट्रवादीच्या विलिनीकरणाची चर्चा वेगाने सुरू आहे. त्यातच दोन ते अडीच महिन्यांनी अजित पवारांचा प्रथम स्मृतिदिन येत आहे. मात्र त्यापूर्वीच हे विलिनीकरण व्हावं, अशी इच्छा मिटकरी यांनी व्यक्त केली आहे.
राऊतांच्या वक्तव्यावर टोला
दरम्यान, राष्ट्रवादीचे २० आमदार फुटणार असल्याचं वक्तव्य खासदार संजय राऊत यांनी केलं होतं. त्यावर मिटकरी यांनी खिल्ली उडवली. आमच्या पक्षाची काळजी करण्यापेक्षा संजय राऊत यांनी स्वतःच्या पक्षाकडे पहावं, असा टोला त्यांनी लगावला.
स्रोत: मूळ बातमी
Leave a Reply