२०१२ मध्ये देशभर गाजलेल्या अण्णा हजारे यांच्या भ्रष्टाचारविरोधी आंदोलनाबाबत एक मोठा दावा समोर आला आहे. हे आंदोलन केवळ भ्रष्टाचाराविरोधातील जनआंदोलन नव्हते, तर त्यामागे भाजप आणि राष्ट्रीय स्वयंसेवक संघाचा म्हणजेच आरएसएसचा पाठिंबा आणि नियोजन होते, असा दावा काँग्रेसच्या माजी अध्यक्षा सोनिया गांधी यांनी आपल्या नव्या पुस्तकात केल्याचे समोर आले आहे. या दाव्यामुळे तत्कालीन युपीए सरकारविरोधात झालेल्या आंदोलनाची पुन्हा चर्चा सुरू झाली आहे.
पुस्तकात नेमका काय दावा?
सोनिया गांधी यांच्या ‘बिलॉन्गिंग: अ जर्नी ऑफ लव्ह’ या पुस्तकातील उल्लेखानुसार, व्यापक अधिकार असलेले लोकपाल विधेयक मंजूर करण्याच्या मागणीसाठी अण्णा हजारे यांना दिल्लीत आणण्यात आले होते. त्यांच्या उपोषणाला देशभरातून मोठा प्रतिसाद मिळाला. भ्रष्टाचाराच्या मुद्द्यावर नागरिक रस्त्यावर उतरले आणि तत्कालीन युपीए सरकारविरोधात वातावरण तापले. या आंदोलनामागे भाजप आणि आरएसएसचा हात असल्याचा दावा पुस्तकात करण्यात आला आहे. आंदोलनात सहभागी असलेल्या काही प्रमुख व्यक्तींनी नंतर हे आंदोलन भाजप आणि संघाच्या पाठिंब्याने आयोजित करण्यात आल्याची कबुली दिल्याचं देखील पुस्तकात नमूद असल्याचा दावा केला जात आहे.
या आंदोलनाचा प्रमुख मुद्दा असलेल्या लोकपाल विधेयकाबाबत देखील सोनिया गांधी यांनी भाष्य केले आहे. २०१४ मध्ये लोकपाल आणि लोकायुक्त कायदा मंजूर झाला. या कायद्यानुसार केंद्रात लोकपाल आणि राज्यांमध्ये लोकायुक्तांची व्यवस्था करण्यात आली. सार्वजनिक पदांवरील व्यक्तींविरोधात भ्रष्टाचाराच्या तक्रारींची चौकशी करण्यासाठी ही यंत्रणा निर्माण करण्यात आली. मात्र, भाजप सत्तेत आल्यानंतर ही व्यवस्था प्रभावीपणे काम करू शकली नाही, अशी टीका देखील पुस्तकाच्या माध्यमातून करण्यात आली आहे.
मोदींच्या उदयाची पार्श्वभूमी
सरकारविरोधातील आंदोलनाचा राजकीय उद्देश साध्य झाल्यानंतर अण्णा हजारे आणि त्या आंदोलनाची चर्चा हळूहळू कमी झाली, असा दावाही सोनिया गांधी यांनी केला आहे. दरम्यान, या आंदोलनाच्या काळात आरएसएस पडद्यामागे नरेंद्र मोदी यांना राष्ट्रीय पातळीवर पुढे आणण्याची तयारी करत असल्याचा देखील उल्लेख पुस्तकात असल्याचे सांगितले जात आहे. त्यावेळी नरेंद्र मोदी गुजरातचे मुख्यमंत्री होते. संघाच्या विचारसरणीत वाढलेले आणि संघटन कौशल्यासाठी ओळखले जाणारे मोदी यांची मुख्यमंत्री म्हणून खंबीर आणि उद्योगस्नेही नेते अशी प्रतिमा तयार झाली होती. त्यांच्या आक्रमक प्रचारामुळे ते राष्ट्रीय राजकारणाच्या केंद्रस्थानी आले, असा दावा या पुस्तकात करण्यात आला आहे. एकूणच, या पुस्तकातील उल्लेखांमुळे अण्णा आंदोलन, भाजप आणि आरएसएसची कथित भूमिका, युपीए सरकारवरील दबाव आणि मोदींच्या उदयाची पार्श्वभूमी या मुद्द्यांवर नवा राजकीय वाद निर्माण होण्याची शक्यता आहे.
स्रोत: मूळ बातमी
Leave a Reply