घरगुती वस्तूंच्या वाढत्या किमतींमुळे सर्वसामान्यांच्या खिशाला पुन्हा एकदा फटका बसणार आहे. हिंदुस्तान युनिलिव्हर लिमिटेड या कंपनीने सर्फ एक्सेल, रिन आणि व्हील या लोकप्रिय डिटर्जंटच्या किमती वाढवलेल्या आहेत. काही उत्पादनांच्या किमतीत तब्बल ११ टक्क्यांपर्यंत वाढ झाली. विशेष म्हणजे, मोती गुलाब साबणही महागला आहे. त्यामुळे कपडे धुण्यापासून ते रोजच्या वापरातला साबण खरेदीपर्यंत सर्वसामान्यांना आता जास्त पैसे मोजावे लागणार आहेत.
किमती का वाढल्या
कंपनीने उत्पादनांच्या किमती वाढण्यामागे कच्च्या मालाच्या वाढत्या किमती हे प्रमुख कारण असल्याचं सांगितलं जातंय. उत्पादन खर्च वाढल्यामुळे कंपनीच्या नफ्यावर दबाव निर्माण होतोय. त्यामुळे वाढलेल्या खर्चाचा काही भार ग्राहकांवर टाकण्यासाठी कंपनीने उत्पादनांच्या किमती वाढवलेल्या आहेत. कंपनीच्या एमडी आणि सीईओ प्रिया नायर यांनीही इनपुट कॉस्टमधला बदल लक्षात घेऊन किमतींबाबत निर्णय घेतला जाईल, असं म्हटलं होतं.
नवे दर
सर्फ एक्सेल क्विक वॉश १ किलो पॅक २३५ रुपयांवरून २४५ रुपये झाला आहे. ५०० ग्रॅम पॅक १२३ रुपयांवरून १२८ रुपये झाला आहे. सर्फ एक्सेल इझी वॉश १ किलो १६७ रुपयांवरून १७२ रुपये आणि ५०० ग्रॅम पॅक ८५ रुपयांवरून ८७ रुपये झाला आहे. सर्फ एक्सेल २५० ग्रॅम बार ४२ रुपयांवरून ४५ रुपये झाला आहे. रिन आला ५०० मिली ९० रुपयांवरून ९५ रुपये, रिन पावडर १ किलो १२० रुपयांवरून १२३ रुपये आणि ५०० ग्रॅम ६१ रुपयांवरून ६३ रुपये झाली आहे. व्हील पावडर १ किलो ९० रुपयांवरून ९३ रुपये झाली असून ५०० ग्रॅम पॅकची किंमत आता ४७ रुपये आहे. डिटर्जंटसोबतच मोती गुलाब साबणाच्या किमतीतही वाढ करण्यात आलेली आहे. १५० ग्रॅम साबणाची किंमत ७४ रुपयांवरून ८२ रुपये झाली. म्हणजेच ग्राहकांना आता एका साबणासाठी ८ रुपये जास्त मोजावे लागतील.
सर्वसामान्यांच्या बजेटवर परिणाम
दैनंदिन वापरातल्या वस्तू महागल्यामुळे सर्वसामान्य कुटुंबाच्या मासिक बजेटवर परिणाम होण्याची शक्यता आहे. आधीच महागाईचा सामना करणाऱ्या ग्राहकांना आता डिटर्जंट आणि साबण खरेदीसाठी जास्त खर्च करावा लागेल. या निर्णयामुळे घरगुती वस्तूंच्या बाजारातही महागाईची झळ जाणवू लागली आहे.
स्रोत: मूळ बातमी
Leave a Reply