आजच्या काळात नोकरी मिळवणे आणि ती टिकवणे अनेकांसाठी मोठे आव्हान बनले आहे. त्यामुळे बरेच कर्मचारी आपल्या कामासाठी स्वतःचा वेळ, कुटुंब आणि आरोग्य यांकडेही दुर्लक्ष करतात. आपण ज्या संस्थेत काम करतो, तिथे प्रामाणिकपणे काम करणे महत्त्वाचे असले, तरी त्या संस्थेलाच आपली संपूर्ण ओळख बनवणे योग्य आहे का, असा प्रश्न इन्फोसिसचे सह-संस्थापक एन. आर. नारायण मूर्ती यांनी उपस्थित केला आहे. हा संदेश त्यांनी इन्फोसिसमधील एका मार्गदर्शन सत्रादरम्यान कर्मचाऱ्यांना आणि तरुणांना दिला. त्यात त्यांनी कामावर प्रेम करण्याचा, पण कंपनीच्या प्रेमात न पडण्याचा सल्ला दिला आहे.
कामात रस घ्या, केवळ पगारासाठी काम करू नका
मूर्ती यांच्या म्हणण्यानुसार, आपण जे काम करतो, त्यात मनापासून रस असणे गरजेचे आहे. केवळ महिन्याच्या पगारासाठी काम करण्याऐवजी त्यातून काहीतरी नवीन शिकण्याचा प्रयत्न केला पाहिजे. सोपवलेली जबाबदारी चांगल्या पद्धतीने पूर्ण करणे, स्वतःच्या कौशल्यांमध्ये सुधारणा करणे आणि कामाचा दर्जा वाढवणे याकडे लक्ष दिले पाहिजे. जेव्हा एखादी व्यक्ती कामाचा आनंद घेते, तेव्हा तिला प्रत्येक वेळी वरिष्ठांच्या कौतुकाची किंवा इतरांच्या शाबासकीची वाट पाहावी लागत नाही, असे त्यांनी सांगितले.
कंपनी म्हणजे कुटुंब नव्हे
मूर्ती पुढे म्हणाले, आपल्या कंपनीच्या इतके प्रेमात पडू नका की तुमची संपूर्ण ओळख तिच्याशी जोडली जाईल. प्रत्यक्षात कंपनी हे कुटुंब नसून एक व्यवसाय आहे. काळानुसार माणसे बदलतात, प्रमुख बदलतात, धोरणे बदलतात आणि कधीकधी कंपनीची काम करण्याची पद्धतसुद्धा बदलते. तुम्ही आज ज्या कंपनीत काम करता, तिथे काही वर्षांत तुमच्यासाठी जागा नसेलही. कधीकधी कंपनी एखाद्याला कामावरून काढून टाकू शकते, किंवा कधीकधी तुम्ही अधिक चांगल्या संधीसाठी नोकरी सोडू शकता. जर तुम्ही स्वतःला केवळ त्याच कंपनीशी जोडले असेल, तर त्यातून बाहेर पडणे खूप कठीण होऊन जाते.
अनेक कर्मचारी वर्षानुवर्षे एकाच कंपनीत काम करत असतात. त्यामुळे तिथल्या सहकाऱ्यांशी आणि वातावरणाशी त्यांचे भावनिक नाते तयार होते. कामाचा ताण वाढला, सतत जास्त वेळ काम करावे लागले किंवा प्रगतीच्या संधी मिळेनाशा झाल्या, तरी काही जण नोकरी सोडण्याचा विचार करत नाहीत.
खरी ताकद तुमच्या कौशल्यात आहे
आपण कोणत्या कंपनीत काम करतो, यापेक्षा आपण काय शिकतो आणि किती चांगले काम करू शकतो, हे अधिक महत्त्वाचे आहे. कंपनी बदलली तरी आपले कौशल्य, अनुभव आणि काम करण्याची क्षमता आपल्यासोबतच राहते. त्यामुळे नवीन गोष्टी शिकत राहणे, स्वतःला अद्ययावत ठेवणे आणि भविष्यातील संधींसाठी तयार राहणे गरजेचे आहे.
मूर्ती यांनी पाच गोष्टींकडे लक्ष देण्याचा सल्ला दिला आहे. सोपवलेले काम प्रामाणिकपणे आणि चांगल्या दर्जाचे करण्याचा प्रयत्न करा. स्वतःची ओळख केवळ कंपनीपुरती मर्यादित ठेवू नका. नवीन कौशल्य शिका आणि स्वतःच्या क्षमतांमध्ये सातत्याने सुधारणा करा. काम आणि वैयक्तिक आयुष्य यांच्यात समतोल ठेवा. सध्याच्या नोकरीत प्रगतीची संधी नसेल, तर इतर पर्यायांचा विचार करण्यास घाबरू नका.
स्रोत: मूळ बातमी
Leave a Reply