राष्ट्रवादी काँग्रेसच्या अजित पवार गटाचे प्रदेशाध्यक्ष सुनील तटकरे यांनी केलेल्या गौप्यस्फोटानंतर पुन्हा एकदा दोन्ही राष्ट्रवादींच्या विलिनीकरणाची चर्चा सुरू झाली आहे. तटकरे यांनी सांगितले होते की, अजित पवार असते तर १२ फेब्रुवारी रोजीच विलिनीकरण झाले असते. त्यांनी याबाबत मुख्यमंत्र्यांना कल्पना दिली होती, असेही तटकरे म्हणाले होते. यावर आता मुख्यमंत्री देवेंद्र फडणवीस यांची पहिली प्रतिक्रिया समोर आली आहे.
नेमकं काय म्हणाले फडणवीस?
शेवटी हे दोन पक्ष आहेत, दोन्हीही स्वतंत्र पक्ष आहेत, असे फडणवीस म्हणाले. त्या दोन्ही पक्षांचे निर्णय ते मिळून घेतील. त्यांच्या पक्षात शरद पवार यांसारखे मोठे नेते आहेत. तिकडे सुनेत्रा पवार आहेत, प्रफुल्ल पटेल आहेत, सुनील तटकरे आहेत, पार्थ पवार आहेत. त्यामुळे त्यांच्याबद्दल आपण काही बोलणे किंवा निर्णय करणे योग्य होणार नाही, असे फडणवीस यांनी स्पष्ट केले.
कोणताही निर्णय घेताना ते आपल्याला विचारात घेतील, कारण राष्ट्रीय लोकशाही आघाडीतील आपण मोठे भागीदार आहोत, असे फडणवीस म्हणाले. आज तरी या संदर्भात प्रतिक्रिया देणे योग्य होणार नाही. त्यांनी अद्याप आपल्याला या संदर्भात काहीही विचारलेले नाही. त्यांच्या चर्चा सुरू असतील तर ते आपल्याला विचारतील आणि त्यावर प्रतिक्रिया दिली जाईल, असेही मुख्यमंत्री म्हणाले.
प्रफुल्ल पटेल यांच्या भेटीनंतर चर्चेला उधाण
प्रफुल्ल पटेल यांनी शरद पवार यांची रुग्णालयात जाऊन भेट घेतली होती. त्यानंतर पुन्हा एकदा दोन्ही राष्ट्रवादींच्या विलिनीकरणाच्या चर्चेला उधाण आले. त्यातच तटकरे यांनीही विलिनीकरणासंदर्भात मोठा गौप्यस्फोट केला होता. त्यामुळे या विषयावर राजकीय वर्तुळात चर्चा सुरूच आहे.
स्रोत: मूळ बातमी
Leave a Reply