संगमनेर विधानसभा मतदारसंघात विधानसभा निवडणुकीत चाळीस वर्षांनंतर सत्तांतर झाले. तेव्हापासून तांबे-थोरात विरुद्ध खताळ असा संघर्ष अजूनही शमलेला नाही. दोन्ही नेत्यांमध्ये कधी श्रेयवादाची लढाई तर कधी राजकीय आरोप-प्रत्यारोप सुरूच आहेत. अशातच आता आमदार अमोल खताळ यांनी आमदार सत्यजित तांबे यांच्यावर जोरदार निशाणा साधला आहे.
दोन दिवसांपूर्वी आमदार सत्यजित तांबे यांनी नगरपालिकेसाठी आणलेल्या स्वच्छता वाहनांची रॅली काढली. याच कार्यक्रमाचा धागा पकडत खताळ यांनी तांबे यांच्यावर निशाणा साधला. वाहतूक शाखेच्या उद्घाटनप्रसंगी बोलताना खताळ म्हणाले की, मी दाढी असलेल्या नेत्याचाच चेला आहे. त्यामुळे दाढी-मिशा नसलेल्यांनी मला राजकारण शिकवू नये, असा टोला त्यांनी लगावला.
नेमकं काय म्हणाले अमोल खताळ?
दोन वर्षे आणि चाळीस वर्षे यांची तुलना संगमनेरकर पाहत आहेत, असे खताळ म्हणाले. शिंदे साहेबांचा फोटो लावायचा, महायुतीचा फोटो लावायचा आणि आम्ही आणले असे सांगायचे, असा आरोप त्यांनी केला. संस्था तुमच्याकडे आहे, नगरपालिका तुमच्याकडे आहे. जे आणले ते संगमनेरकरांसाठी आणले, असे ते म्हणाले. मामाच्या कार्यालयाबाहेरची साफसफाई करायला हे तुम्हाला दिले नव्हते, असा टोलाही त्यांनी लगावला.
कार्यकर्त्यांनी मला उशिरा सांगितले. मला आधी सांगितले असते तर मी माझ्या पद्धतीने चांगला बंदोबस्त केला असता, असे खताळ म्हणाले. हा दाढीवाला सुद्धा दाढीवाल्या नेत्याचा चेला आहे, हे त्यांना दाखवून दिले असते, असेही ते म्हणाले. जिल्ह्याचे राजकारण तुम्हाला लखलाभ, सहकाराचे राजकारण तुम्हाला लखलाभ, असे म्हणत नगरची स्वाभिमानी जनता आपल्या पाठीशी असल्याचे त्यांनी सांगितले. त्यामुळे संगमनेरमध्ये खताळ विरुद्ध सत्यजित तांबे-बाळासाहेब थोरात असा संघर्ष चांगलाच तापताना दिसत आहे.
स्रोत: मूळ बातमी
Leave a Reply