भारतातील सर्वात प्रसिद्ध मद्य ब्रँडपैकी एक असलेल्या ओल्ड मंकच्या विक्रीवर महाराष्ट्रात याच वर्षी मे-जूनपासून बंदी आली होती. थंडीत मोठ्या आवडीने पिले जाणारे हे मद्य अचानक बाजारातून गायब होण्यामागे त्याचा ‘रम’ हा दर्जा कारणीभूत ठरला. देशाची अन्न नियामक संस्था, भारतीय खाद्य सुरक्षा आणि मानक प्राधिकरणाच्या मते हे मद्य रम नाही.
या वादानंतर खोपोलीत ओल्ड मंक तयार करणाऱ्या कंपनीने गुरुवारी मुंबई उच्च न्यायालयातून आपली याचिका मागे घेतली आहे. कंपनीने म्हटले आहे की आता अन्न नियामक संस्थेकडे नवीन लेबल जमा केले जाणार आहे. त्यामुळे या लोकप्रिय मद्यावरील बंदी लवकरच उठण्याची शक्यता निर्माण झाली आहे.
लेबलवरून सुरू झाला वाद
हा संपूर्ण वाद बाटलीच्या लेबलवरून सुरू झाला आहे. अन्न नियामक संस्थेचे म्हणणे आहे की या पेयात बाहेरून रमचा फ्लेवर मिसळला आहे. मात्र, बाटलीच्या लेबलवर स्पष्ट केलेले नाही की हे फ्लेवर्ड लिकर आहे की रम-फ्लेवर्ड स्पिरीट आहे. नियामक यंत्रणेनुसार ही गोष्ट लपवून ग्राहकांची दिशाभूल केली जात आहे. सप्टेंबरमध्ये न्यायालयात झालेल्या सुनावणी दरम्यान अन्न नियामक संस्थेचे वकील राजशेखर गोविलकर यांनी स्पष्ट केले की रम म्हणून या मद्याला विकता येणार नाही.
‘रमसारखे’ शब्द लिहिल्यावरच विक्रीला परवानगी
अन्न नियामक संस्थेच्या मते न्यूट्रल स्पिरीटमध्ये बाहेरून रमचा फ्लेवर मिसळून तयार केलेल्या उत्पादनाला रम म्हटले जाऊ शकत नाही. या शिवाय या नियामक संस्थेने बाटलीवर लिहिलेल्या ‘सात वर्षे जुनी ब्लेंडेड’ या दाव्यावरही आक्षेप व्यक्त केला आहे. वकील राजशेखर गोविलकर यांनी न्यायालयाला सांगितले की या फ्लेवर असलेल्या उत्पादनाला कोणत्याही खास लाकडी पिंपात ठेवून जुने केले जात नाही. ओल्ड मंकच्या बाटलीच्या लेबलवर ‘रमसारखे’ लिहिले जावे, तेव्हाच त्याच्या विक्रीला परवानगी दिली जाईल. त्यामुळे कंपनी अखेर असे लेबल न्यायालयात जमा करण्यास तयार झाली आहे.
स्रोत: मूळ बातमी
Leave a Reply