जळगाव शहरातील काव्यरत्नावली चौकात तब्बल ३२ फूट उंचीचा भव्य लामण दीप उभारण्यात आला आहे. दिवाळीच्या रोषणाईच्या काळात ही कलाकृती शहरवासीयांचे लक्ष वेधून घेत आहे. सुमारे ८०० किलो वजन असलेल्या या दीपात सात ज्योती साकारण्यात आल्या असून, त्यातून सर्वांगीण समृद्धीचा संदेश देण्यात आला आहे.
सात ज्योती, सात क्षेत्रांचे प्रतिनिधित्व
भारतीय परंपरेत दीपाला ज्ञान, मांगल्य आणि समृद्धीचे प्रतीक मानले जाते. याच विचाराला आधुनिक कलात्मकतेची जोड देत या लामण दीपाची रचना करण्यात आली आहे. आर्थिक, सामाजिक, शैक्षणिक, आरोग्य, सांस्कृतिक, सुरक्षा आणि धार्मिक अशा जीवनातील सात महत्त्वाच्या क्षेत्रांचे प्रतिनिधित्व करणाऱ्या सात ज्योती या दीपात आहेत. समाजातील प्रत्येक घटकाच्या जीवनात या सातही क्षेत्रांत प्रगती व्हावी, हा या संकल्पनेमागील मुख्य विचार आहे. दीपातील प्रत्येक ज्योत सहा फुटांपेक्षा अधिक आकाराची आहे.
महिनाभराच्या मेहनतीतून कलाकृती साकार
ही कलाकृती भवरलाल अँड कांताबाई जैन फाउंडेशनच्या माध्यमातून उभारण्यात आली आहे. जैन इरिगेशन सिस्टिम्स लिमिटेडचे अध्यक्ष अशोक जैन यांच्या संकल्पनेतून आणि मार्गदर्शनाखाली तिची निर्मिती झाली. गेल्या महिनाभरापासून जैन इरिगेशनच्या कला विभागाचे विजय जैन, विकास विभागाचे अनिल पाटील, चंद्रशेखर विरपणकर आणि त्यांच्या २० सहकाऱ्यांनी ही कलाकृती साकारण्यासाठी विशेष परिश्रम घेतले. दीपाच्या सजावटीत राजेश नाईक यांचेही महत्त्वाचे योगदान राहिले. नाजूक धाग्यांमध्ये गुंफलेला हा दीप पाहताना आकाशातून एखादी दिव्य कलाकृती पृथ्वीवर अवतरल्याचा भास होतो. ‘बंध आकाशाशी आणि नाते धरतीशी’ ही त्यामागील संकल्पना आहे. प्रकाशाचा उत्सव साजरा करताना इतरांच्याही जीवनात उजेड निर्माण करण्याची भावना प्रत्येकाच्या मनात जागृत व्हावी, हाच या दीपाचा संदेश असल्याचे अशोक जैन यांनी सांगितले.
स्रोत: मूळ बातमी
Leave a Reply