दिवाळीच्या रात्री माता लक्ष्मीची कृपा मिळावी, घरात सुख-शांती आणि समृद्धी नांदावी, अशी प्रत्येकाची इच्छा असते. लक्ष्मीपूजनाच्या दिवशी देवी पृथ्वीवर भ्रमण करते आणि ज्या घरातील पूजेने ती प्रसन्न होते, त्या घरात ती वास करते, अशी मान्यता आहे. त्यामुळे प्रार्थनेबरोबरच काही पारंपरिक उपायही केले जातात. हे उपाय केल्याने घरातील दारिद्र्य आणि नकारात्मकता दूर होऊन पैशांची भरभराट होते, अशी श्रद्धा आहे.
नाणे आणि झाडूचे उपाय
रात्री १२ ते १२.३० या वेळेत जवळपास पिंपळ, आवळा किंवा बेलपत्राचे झाड असेल, तर त्या झाडाखाली जाऊन घरी परतावे. त्यानंतर लक्ष्मीपूजनाच्या ठिकाणी नमस्कार करून पूजेत ठेवलेले एक रुपयाचे किंवा चांदीचे नाणे तिजोरीत अथवा कपाटात ठेवावे. यामुळे कर्जातून लवकर मुक्ती मिळते आणि घरात पैशांची भरभराट होते, असे मानले जाते. दिवाळीच्या रात्री झोपण्यापूर्वी घरातील झाडूखाली एक रुपयाचे किंवा चांदीचे नाणे ठेवण्याचीही मान्यता आहे. असे केल्याने घरातील नकारात्मकता दूर होते आणि देवी प्रसन्न होते, अशी श्रद्धा आहे.
पुरचुंडी, गोमती चक्र आणि शंखनाद
पाच अख्ख्या सुपाऱ्या, काळी हळद आणि पाच कवड्या गंगाजलाने स्वच्छ करून लाल कपड्यात बांधाव्यात. लक्ष्मीपूजनाच्या वेळी ही पुरचुंडी चांदीच्या ताटात किंवा वाटीत ठेवून देवीसोबत तिची पूजा करावी. दुसऱ्या दिवशी ही पुरचुंडी धन ठेवण्याच्या ठिकाणी ठेवावी. तसेच पाच सुपाऱ्या, पाच हळदीच्या गाठी, पाच कवड्या आणि पाच गोमती चक्र लाल कपड्यात बांधून लक्ष्मीपूजनाच्या ठिकाणी ठेवावेत. पूजा झाल्यानंतर ही पुरचुंडी घराच्या उंबरठ्यावर किंवा व्यवसायाच्या ठिकाणी बांधण्याची धार्मिक मान्यता आहे. दिवाळीच्या संध्याकाळी किंवा रात्री पिंपळाच्या झाडाच्या मुळाशी कुंकू, दही आणि अख्खी उडीद डाळ ठेवून तिथे तुपाचा दिवा लावावा. लक्ष्मीपूजनानंतर घरातील प्रत्येक खोलीत शंख आणि घंटा वाजवण्याचीही परंपरा सांगितली आहे. देवीसमोर गाईच्या तुपाचा सात किंवा नऊ वातींचा दिवा लावावा आणि दिवाळीच्या रात्री लक्ष्मी मंत्र १०८ वेळा जपावा.
ही माहिती पारंपरिक श्रद्धा आणि मान्यतांवर आधारित आहे. त्याची शास्त्रीय पुष्टी केलेली नाही, त्यामुळे कोणताही निर्णय घेण्याआधी संबंधित क्षेत्रातील तज्ज्ञांचा सल्ला घ्यावा.
स्रोत: मूळ बातमी
Leave a Reply