दिवाळी म्हटले की पूर्वी नातेवाईक आणि मित्रमंडळींना प्रत्यक्ष भेटून शुभेच्छा देण्याची परंपरा होती. त्यानंतर ग्रीटिंग कार्ड, शुभेच्छापत्रे आणि मोबाइलवरील एसएमएसच्या माध्यमातून शुभेच्छा देण्याचा ट्रेंड आला. मात्र, आता डिजिटल युगात दिवाळीच्या शुभेच्छांचे स्वरूप पूर्णपणे बदलले आहे. सोशल मीडियाच्या माध्यमातून अवघ्या काही सेकंदांत शेकडो लोकांपर्यंत शुभेच्छा पोचवण्याची नवी पद्धत रूढ झाली आहे.
फेसबुक, व्हॉट्सॲप, इन्स्टाग्राम आणि स्नॅपचॅटवरील पोस्ट आणि स्टेटसच्या माध्यमातून दिवाळीचा आनंद व्यक्त केला जात आहे. पूर्वी आकर्षक ग्रीटिंग कार्ड खरेदी करून त्यावर स्वतःच्या हस्ताक्षरात संदेश लिहिला जायचा. आता फोटो, व्हिडिओ, आकर्षक ग्राफिक्स, रील्स आणि डिजिटल पोस्टरच्या माध्यमातून शुभेच्छा देण्याची पद्धत लोकप्रिय झाली आहे.
एआय शुभेच्छापत्रांचा ट्रेंड
यंदा एआयचा वापर वाढला असून चॅट जीपीटी, जेमिनीसह विविध टूलकडून बनवण्यात आलेल्या वैयक्तिक नाव आणि फोटो असलेल्या दिवाळी शुभेच्छा पोस्टरचा ट्रेंड अधिक दिसून येत आहे. स्वतःचा फोटो, नाव, व्यवसाय किंवा पदाचा उल्लेख करून आकर्षक डिझाइनमध्ये शुभेच्छा संदेश तयार केले जात आहेत. काही जण लक्ष्मीपूजन, पणत्या, आकाशकंदील, रांगोळी आणि फटाक्यांच्या छायाचित्रांचा वापर करून स्वतःचे डिजिटल शुभेच्छापत्र तयार करत आहेत, तर काही जण व्हिडिओ एडिटिंगच्या माध्यमातून शुभेच्छांना वेगळे रूप देत आहेत.
पूर्वी आकर्षक शुभेच्छा पोस्टर तयार करण्यासाठी ग्राफिक डिझायनर किंवा फोटो एडिटिंगची माहिती असणे आवश्यक होते. आता एआयच्या मदतीने काही क्षणांतच आकर्षक डिजिटल चित्रे, पोस्टर, व्हिडिओ आणि शुभेच्छा संदेश तयार करता येत आहेत. स्वतःच्या छायाचित्राला पारंपरिक वेशभूषा, दिवाळीची सजावट किंवा रंगीबेरंगी रोषणाईचे स्वरूप देण्याचे प्रयोग केले जात आहेत. एआयच्या माध्यमातून आकर्षक मराठी शुभेच्छा संदेश, कविता, व्हिडिओ आणि ॲनिमेशन तयार करण्याचे प्रमाणही वाढले आहे.
व्हॉट्सॲप स्टेटस सर्वाधिक लोकप्रिय
व्हॉट्सॲप स्टेटस हा शुभेच्छा देण्याचा सर्वाधिक लोकप्रिय पर्याय ठरत आहे. धनत्रयोदशी, नरक चतुर्दशी, लक्ष्मीपूजन, पाडवा आणि भाऊबीज अशा प्रत्येक सणासाठी स्वतंत्र संदेश आणि आकर्षक छायाचित्रे शेअर केली जात आहेत. यामध्ये पारंपरिक मराठी शुभेच्छांसोबत हिंदी आणि इंग्रजी संदेशांचाही मोठ्या प्रमाणावर वापर होत आहे.
सोशल मीडियामुळे शुभेच्छा देण्याची पद्धत सोपी, जलद आणि व्यापक झाली असली, तरी प्रत्यक्ष भेटीतील आपुलकीला पर्याय नाही. अनेकदा शेकडो शुभेच्छा संदेश येतात, मात्र त्यातील वैयक्तिक संवाद कमी होत असल्याचेही चित्र आहे. तरीही बदलत्या काळानुसार माध्यम बदलले असले, तरी त्यामागील भावना तीच आहे. तंत्रज्ञानाच्या या युगात दिवाळीचा आनंद आता केवळ घराघरांतच नव्हे, तर मोबाइलच्या स्क्रीनवरही उजळून निघत आहे.
स्रोत: मूळ बातमी
Leave a Reply