ऊसदरावरून अहिल्यानगरात दुसरी बैठकही निष्फळ; शेतकरी संतप्त

अहिल्यानगरात ऊसाच्या दरावरून झालेल्या दुसऱ्या बैठकीतही कोणताही तोडगा निघाला नाही. गाळप हंगाम सुरू होऊन एक महिना उलटला, तरी कारखाने दर जाहीर करण्याबाबत काहीच बोलत नसल्याने शेतकरी संघटनांच्या पदाधिकाऱ्यांनी तीव्र नाराजी व्यक्त केली. दर जाहीर होण्याआधीच उसाचे मोठ्या प्रमाणात गाळप झाले असताना कारखाने शांत का आहेत, असा सवाल बैठकीत उपस्थित करण्यात आला.

पालकमंत्र्यांच्या उपस्थितीत झालेल्या या बैठकीला जिल्हाधिकारी, जिल्हा परिषदेचे मुख्य कार्यकारी अधिकारी, पोलिस अधीक्षक आणि निवासी उपजिल्हाधिकारी यांच्यासह साखर विभागाचे प्रतिनिधी, साखर कारखान्यांचे प्रतिनिधी तसेच शेतकरी संघटनांचे नेते आणि कार्यकर्ते उपस्थित होते. बैठकीत शेतकऱ्यांच्या विविध मागण्यांवर चर्चा झाली, पण दराबाबत निर्णय होऊ शकला नाही.

दुष्काळाने उत्पादन घटले; साखर महागली तरी दर नाही

शेतकरी संघटनांच्या पदाधिकाऱ्यांनी बैठकीत सांगितले की, दुष्काळामुळे यंदा उसाचे उत्पादन २५ ते ३० टक्के घटले आहे. हंगाम लवकर सुरू करून कारखान्यांनी अपरिपक्व उसाचे गाळप सुरू केले, त्यामुळे चांगली साखर उतारा मिळणार नाही, असेही त्यांनी नमूद केले. साखर ३८ रुपये असताना पहिला हप्ता ३ हजार २०० रुपये जाहीर करण्यात आला होता. आता साखरेचे दर ५० रुपयांच्या वर गेले असताना किमान ४ हजार रुपये पहिला हप्ता जाहीर करायला अडचण काय, असा प्रश्न त्यांनी उपस्थित केला.

शेतकऱ्यांना वजनाचे संदेश तत्काळ मिळावेत, अशी मागणीही बैठकीत करण्यात आली. वजनकाट्यांची तपासणी करण्यासाठी जाताना संबंधित विभाग कारखान्यांना आधीच कल्पना देत असल्याचा आरोपही शेतकरी संघटनांनी केला. जिल्ह्यातील सर्व साखर कारखान्यांच्या संचालक मंडळांनी ऊस दर आणि ऊस उत्पादक शेतकऱ्यांच्या इतर मागण्यांबाबत बैठक घेऊन ९ तारखेपर्यंत दर जाहीर करावेत, असे बैठकीत सांगण्यात आले.

बँकेच्या धोरणानंतर दर जाहीर करणार, कारखान्याची भूमिका

एका सहकारी कारखान्याच्या अध्यक्षांनी दर जाहीर करण्याबाबत भूमिका स्पष्ट करताना सांगितले की, जिल्हा सहकारी बँकेच्या साखर कारखान्यांबाबतच्या धोरणानंतर दर जाहीर करणे योग्य राहील. सध्या बँकेवर प्रशासक आहेत. नवीन संचालकांची बैठक होईल, अध्यक्ष आणि उपाध्यक्षांची निवड होईल, त्यानंतर बँक कारखान्यांना काय मदत करते, त्यानुसार दर जाहीर करण्यात येईल, असे त्यांनी सांगितले. यावर शेतकरी संघटनांनी आक्षेप नोंदवला.

जिल्हा बँकेच्या सत्तेसाठी जसे सर्वपक्षीय कारखानदार एकत्र आले, तसेच शेतकऱ्यांना दर देण्यासाठीही एकत्र या, अशी अपेक्षा शेतकरी संघटनांच्या प्रतिनिधींसह शेतकऱ्यांनी व्यक्त केली. शेतकऱ्यांची दिवसाढवळ्या होणारी लूट कधी थांबणार, असा प्रश्नही जिल्हाभरातील शेतकऱ्यांनी उपस्थित केला आहे.

स्रोत: मूळ बातमी