नाशिकमध्ये गुरुवारी सकाळी एका भंगाराच्या गोदामाला आग लागली. तिगरानिया रस्त्यावर वीज वितरण कार्यालयाच्या मागे असलेल्या या गोदामात लागलेल्या आगीत सुमारे २५ लाख रुपयांचा भंगार माल जळून खाक झाला. सुदैवाने या घटनेत कोणतीही जीवितहानी झाली नाही.
दीड तासांच्या प्रयत्नानंतर आग आटोक्यात
आगीची माहिती मिळताच अग्निशमन मुख्यालयाचे दोन, पंचवटी विभाग, पंचवटी केंद्र, सिडको, सातपूर आणि नाशिक रोड येथील अशा एकूण सात बंब घटनास्थळी दाखल झाले. आगीने रौद्ररूप धारण केल्याने आगीचे लोळ हवेत उंच उठताना दिसत होते आणि परिसरातील नागरिकांमध्ये भीतीचे वातावरण निर्माण झाले होते.
अग्निशमन दलाच्या जवानांनी गोदामाच्या चारही बाजूंनी पाण्याचा मारा केला. लिडिंग फायरमन सोमनाथ थोरात, उदय शिर्के, फायरमन साहिल जाधव, वृषभ हिरवे, मंगेश जाधव, शुभम मोरे आणि त्यांच्या सहकाऱ्यांनी सुमारे दीड तास अथक प्रयत्न केल्यानंतर आगीवर नियंत्रण मिळवले.
२५ लाखांचे नुकसान; कारण अद्याप अस्पष्ट
या आगीत प्लास्टिक वस्तू, रबर, टायर, तेलाचे डबे आणि फर्निचर असा सुमारे २५ लाख रुपयांचा भंगार वस्तूंचा साठा जळून गेला. हे गोदाम मोबीन शेख यांचे असल्याचे सांगण्यात आले. आगीचे निश्चित कारण अद्याप समजू शकलेले नाही. या घटनेची नोंद अग्निशमन विभागात करण्यात आली आहे.
स्रोत: मूळ बातमी
Leave a Reply