राज्य सरकारने जाहीर केल्याप्रमाणे दिवाळीच्या आधी दुष्काळग्रस्त शेतकऱ्यांच्या बँक खात्यांवर पाच हजार रुपये अग्रिम मदतीची रक्कम जमा होण्यास सुरुवात झाली आहे. सोमवारपासून ही रक्कम शेतकऱ्यांच्या खात्यावर जमा होत आहे. केंद्राच्या मदतीची वाट न पाहता राज्य सरकारने ही अग्रिम मदत देण्याचा निर्णय घेतला होता.
३३ टक्क्यांपेक्षा अधिक नुकसान झालेल्यांना दिलासा
मागील आठवड्यात मंत्रिमंडळ बैठकीत या मदतीसाठीच्या निधीला मंजुरी देण्यात आली होती. त्यानंतर पिकांच्या नुकसानीचे पंचनामे पूर्ण झालेल्या शेतकऱ्यांपैकी ज्यांचे नुकसान ३३ टक्क्यांपेक्षा अधिक झाले आहे, त्यांना ही मदत वितरित होण्यास सुरुवात झाली आहे. अशा शेतकऱ्यांचे १०० टक्के नुकसान गृहीत धरून मदत दिली जाणार आहे. सध्या पाच हजार रुपये अग्रिम स्वरूपात दिल्यानंतर अंतिम मंजूर मदतीतून ही रक्कम वजा केली जाणार आहे. दुष्काळामुळे खरीप हंगामातील पिकांचे उत्पादन घटले असून, अनेक शेतकऱ्यांना आर्थिक संकटाचा सामना करावा लागत आहे. अशा परिस्थितीत दिवाळीपूर्वी मदतीची रक्कम खात्यावर जमा होण्यास सुरुवात झाल्याने शेतकऱ्यांना सणासाठी तसेच रब्बी हंगामाशी संबंधित आवश्यक खर्चासाठी काही प्रमाणात आर्थिक आधार मिळणार आहे.
३०४ तालुक्यांत दुष्काळ, पंचनामे पूर्ण
राज्यातील दुष्काळाच्या कक्षेत एकूण ३७ हजार ४९६ गावांत पंचनामे करण्यात आले आहेत. पीक नुकसानीचे १०० टक्के पंचनामे पूर्ण झाले असून, ३३ टक्क्यांपेक्षा अधिक नुकसान झालेल्या क्षेत्राची नोंद करण्यात आली आहे. राज्यातील एकूण १ कोटी ४१ लाख ५३ हजार हेक्टर क्षेत्राला दुष्काळाचा फटका बसल्याचे पंचनाम्यांतून स्पष्ट झाले आहे. या बाधित क्षेत्रातील शेतकऱ्यांना मदत मिळावी, यासाठी राज्य शासनाने केंद्र सरकारकडे आर्थिक मदतीचा प्रस्ताव सादर केला आहे.
स्रोत: मूळ बातमी
Leave a Reply