जळगावमधील रामानंदनगरमध्ये बुधवारी एका महापालिका शाळेतील कर्मचाऱ्याने राहत्या घरात आत्महत्या केली. माधवराव माणिक देशमुख (वय ५६) असे त्यांचे नाव आहे. डोक्यावरील कर्ज कसे फेडायचे, या तणावातून त्यांनी हे पाऊल उचलल्याचे त्यांनी मागे ठेवलेल्या चिठ्ठीत नमूद केले आहे.
देशमुख हे पत्नी व मुलासह रामानंदनगरमध्ये राहत होते. त्यांनी खासगी वित्तसंस्थेकडून कर्ज घेतले होते, तसेच परिचितांकडूनही उसनवार रक्कम घेतली होती. वाढते कर्ज फेडण्याच्या विवंचनेत ते सतत तणावात असल्याचे नातेवाइकांनी सांगितले.
चार महिने पगार नाही
देशमुख यांना चार महिन्यांपासून पगार मिळालेला नव्हता. त्यामुळे कर्जाचे हप्ते थकले होते आणि कर्जापोटी दिलेले दोन धनादेश अनादरित झाले होते, अशी माहिती त्यांच्या मित्रांनी दिली. त्यांनी २१ लाख रुपयांचे गृहकर्ज घेतले होते, तसेच इतरांचेही पैसे देणे होते. कर्जाच्या हप्त्यांच्या वसुलीसाठी खासगी वित्तसंस्थांकडून घरी येऊन तगादा लावला जात असल्याचे त्यांचा मुलगा ओम देशमुख याने सांगितले.
बुधवारी सकाळी पत्नीसमवेत चहा घेतल्यानंतर देशमुख हॉलमध्ये गेले. काही वेळाने पत्नीने दरवाजा उघडण्याचा प्रयत्न केला असता प्रतिसाद मिळाला नाही. त्यानंतर मुलाला उठवून शेजाऱ्यांच्या मदतीने दरवाजा तोडण्यात आला. त्यांना शासकीय वैद्यकीय महाविद्यालय व रुग्णालयात नेण्यात आले असता डॉक्टरांनी मृत घोषित केले. चिठ्ठीत त्यांनी व्याज भरून त्रासल्याचे आणि दुसऱ्यांमुळे फसल्याचे नमूद केले आहे.
स्रोत: मूळ बातमी
Leave a Reply