गोकुळ दूध संघाने म्हशीच्या दुधाच्या विक्री दरात सहा रुपये, तर गाईच्या दुधाच्या दरात चार रुपयांची वाढ केली असून, हे नवे दर २१ नोव्हेंबरपासून लागू झाले आहेत. प्रशासक काळात संघाला तब्बल २८ कोटी रुपयांचा तोटा झाल्याचे समोर आले असून, तो भरून काढण्यासाठी आणि दुष्काळामुळे निर्माण झालेली दुधाची टंचाई लक्षात घेऊन ही दरवाढ करण्यात आल्याचे अध्यक्ष राजेश पाटील यांनी सांगितले. या निर्णयावर काँग्रेस नेते आणि आमदार सतेज पाटील यांनी पहिली प्रतिक्रिया दिली आहे.
सतेज पाटील काय म्हणाले?
शेतकऱ्यांना दरवाढ मिळावी, ही सगळ्यांचीच भूमिका असल्याचे सतेज पाटील यांनी सांगितले. मात्र प्रशासक काळात झालेला तोटा हा मूळ आणि अत्यंत महत्त्वाचा मुद्दा असून, त्याबाबत चर्चा करावी लागेल, असेही ते म्हणाले. पुढच्या बैठकीत संघाचे संचालक या तुटीवर चर्चा करतील, असे त्यांनी स्पष्ट केले.
अध्यक्ष राजेश पाटील यांची भूमिका
राजेश पाटील यांनी सांगितले की, सर्व २५ संचालकांच्या संमतीने दरवाढीचा निर्णय घेण्यात आला आहे. म्हशीच्या दुधासाठी उत्पादकांना तीन रुपये, तर गाईच्या दुधासाठी दोन रुपयांची खरेदी दरवाढ दिली जात आहे. हे दर २१ नोव्हेंबरपासून लागू असून, मार्चपर्यंत साधारण १३१ दिवसांचा कालावधी मिळेल. दर महिन्याला परिस्थितीचा आढावा घेऊन पुढील निर्णय घेतले जातील, असेही त्यांनी सांगितले. दरम्यान, गोकुळ पाठोपाठ वारणा दूध संघानेही विक्री दरात सहा रुपयांची वाढ केली आहे. गोकुळ दुधाचा कोल्हापुरातील दर ७२ रुपयांवरून ७८ रुपये, तर पुणे आणि मुंबईत ७८ रुपयांवरून ८४ रुपये झाला आहे. एकाच वेळी एवढी मोठी दरवाढ झाल्याने ग्राहकांनी नाराजी व्यक्त केली असून, मुख्यमंत्र्यांनी हस्तक्षेप करून दर कमी करावेत, अशी मागणी होत आहे.
Leave a Reply