बीड जिल्ह्यात कथित बोगस भरतीतून नियुक्ती मिळवलेल्या ७३ शिक्षकांची सेवा थेट समाप्त करण्यात आली आहे. शिक्षण विभागाच्या या कारवाईमुळे विभागात खळबळ उडाली आहे. हा आकडा आणखी वाढण्याची शक्यता असून, बनावट पदांची निर्मिती करून नियुक्ती मिळवलेल्या आणखी २,२१७ शिक्षकांवर कारवाईची टांगती तलवार असल्याचा दावा तक्रारदार सादेक इनामदार यांनी केला आहे.
२०१२ पासून भरती बंद असतानाही नियुक्त्या
राज्यात २०१२ पासून शिक्षक भरती बंद असतानाही शिक्षकांच्या नियुक्त्या करण्यात आल्याचा आरोप आहे. न्यायालयाच्या सूचनांचा सोयीस्कर अर्थ लावून या नियुक्त्या दिल्याचे तक्रारदाराचे म्हणणे आहे. काही ठिकाणी संच मान्यतेत दुरुस्ती करण्याच्या नावाखाली शिक्षकांची पदे वाढवण्यात आली, तर काही ठिकाणी बनावट विद्यार्थ्यांची संख्या दाखवून संच मान्यतेतील पदसंख्या वाढवण्यात आल्याचा प्रकार समोर आला आहे. या संपूर्ण प्रक्रियेत अन्य बनावट कागदपत्रांचाही वापर करण्यात आल्याची माहिती आहे.
या कथित गैरव्यवहाराविरोधात बीडमधील सामाजिक कार्यकर्ते सादेक इनामदार यांनी तक्रार केली होती. त्यांनी या प्रकरणाचा एसआयटीकडे पाठपुरावा केला. त्यानंतर शिक्षण विभागाने ७३ शिक्षकांची सेवा समाप्त केल्याची माहिती इनामदार यांनी दिली.
आणखी २,२१७ शिक्षकांवर कारवाईची शक्यता
या प्रकरणात आणखी मोठी कारवाई होण्याची शक्यता व्यक्त केली जात आहे. बनावट पदांची निर्मिती करून नियुक्ती मिळवलेल्या आणखी २,२१७ शिक्षकांवर कारवाई होऊ शकते, असा दावा सादेक इनामदार यांनी केला आहे. त्यामुळे आतापर्यंत ७३ शिक्षकांवर झालेल्या कारवाईनंतर आता उर्वरित शिक्षकांबाबत शिक्षण विभाग काय निर्णय घेणार, याकडे लक्ष लागले आहे.
Leave a Reply