अमेरिका आणि इराण यांच्यात गेल्या अनेक दिवसांपासून संघर्ष सुरू आहे. अमेरिका आणि इस्रायलने इराणवर हल्ला केल्यानंतर दोन्ही देशांमध्ये युद्धाला सुरुवात झाली. या युद्धात इराणचं मोठं नुकसान झालं असून अमेरिकेने इराणच्या पायाभूत सुविधा उद्ध्वस्त केल्याचं सांगितलं जातं. दुसरीकडे इराणनेही आखाती देशांमधील अमेरिकेच्या सैन्यतळांवर हल्ले केले, त्यामुळे त्या देशांचंही नुकसान झालं.
या पार्श्वभूमीवर इराणकडून अमेरिकेला पुन्हा एकदा मोठा इशारा देण्यात आला आहे. इराणच्या संसदेचे अध्यक्ष मोहम्मद बाघेर गालिबाफ यांनी संसदेत बोलताना अमेरिकेला थेट इशारा दिला. आमच्यावर हल्ला करण्याचा विचारही करू नका, जर तुम्ही आमच्यावर एक जरी हल्ला केला तर आम्ही थेट युद्धाच्या मैदानात उतरू, असं त्यांनी म्हटलं आहे.
संसदेतून थेट इशारा
इराणची वृत्तसंस्था मेहरने दिलेल्या माहितीनुसार, रविवारी संसदेत बोलताना गालिबाफ यांनी अमेरिकेला उघड इशारा दिला. तुम्ही आमच्यासोबत युद्ध करण्याचा विचार डोक्यातून काढून टाका, असं ते म्हणाले. जर तुम्ही आमच्यावर आणखी एक हल्ला केला तर आम्ही लढाईचं मैदान ठरवू आणि आमचं सर्वात शक्तिशाली सैन्यदल मैदानात उतरवू, असं त्यांनी स्पष्ट केलं.
युद्धविरामासाठी सात अटी
अमेरिकेने आमच्या सात अटी मान्य केल्या तरच युद्धविराम होऊ शकतो, असंही इराणकडून यावेळी सांगण्यात आलं. मात्र या सात अटी नेमक्या कोणत्या आहेत, याबाबत सविस्तर माहिती समोर आलेली नाही. इराणच्या या इशाऱ्यानंतर मध्यपूर्वेत पुन्हा एकदा युद्ध पेटण्याची शक्यता निर्माण झाली असून संपूर्ण जगाचं लक्ष या भागाकडे लागलं आहे.
Leave a Reply