देशातील सर्वांत कठीण परीक्षांपैकी एक असलेल्या नागरी सेवा परीक्षेची तयारी ही केवळ हुशारीची कसोटी नसते. त्यासाठी सातत्य, चिकाटी आणि रात्रंदिवस अभ्यास करण्याची तयारी लागते. अशाच तयारीत गुंतलेल्या एका तरुणाचा व्हिडिओ सध्या समाजमाध्यमांवर मोठ्या प्रमाणात पाहिला जात आहे. तयारीदरम्यान त्याने वापरलेल्या पेनांचा प्रचंड ढीग पाहून अनेकजण थक्क झाले आहेत.
आनंद मोहन असे या तरुणाचे नाव आहे. त्याने आपल्या अभ्यासाच्या खोलीतून एक व्हिडिओ शेअर केला आहे. खोलीत पुस्तके आणि अभ्यासाचे साहित्य दिसत असतानाच, त्याने आतापर्यंत वापरलेले पेन एकत्र करून दाखवले आहेत. पेनांचा हा ढीग पाहून त्याने तयारीसाठी किती मेहनत घेतली असेल, याचा अंदाज येतो.
पेनांचा ढीग पाहून नेटकरी थक्क
व्हिडिओमध्ये आनंद सांगतो की, त्याने पेन मोजले नव्हते. मात्र एका पेटीत साधारण पाचशे पेन बसतात आणि त्याने त्याच्या दुप्पट पेन वापरले आहेत. म्हणजेच तयारीदरम्यान त्याने जवळपास एक हजार पेन वापरले असावेत. त्याने आणखी एक रंजक तपशीलही सांगितला. पन्नास पानांचा एक पूर्ण पेपर लिहिण्यासाठी सुमारे दीड पेन लागतो. वापरलेल्या पेनांच्या संख्येवरून त्याने अंदाजे आठशे ते नऊशे पूर्ण पेपर लिहिले असतील, असे तो म्हणतो.
मेहनत हाच यशाचा मंत्र
व्हिडिओमध्ये आनंदने आपल्या सहकारी उमेदवारांबद्दलही मत व्यक्त केले आहे. त्याच्यासोबत परीक्षा देणाऱ्या उमेदवारांनीही खूप मेहनत घेतली असेल, असे त्याने सांगितले. काहींनी कदाचित त्याच्यापेक्षा जास्त मेहनत घेतली असेल, पण कोणीही कमी मेहनत घेतली असे त्याला वाटत नाही. दरम्यान, या व्हिडिओवर नेटकऱ्यांनी जोरदार प्रतिक्रिया दिल्या आहेत. अनेकांनी त्याच्या कठोर परिश्रमाचे कौतुक केले असून, तो नक्की यशस्वी होईल अशा शुभेच्छाही दिल्या आहेत.
Leave a Reply