२०२६ च्या पहिल्या आठ महिन्यांत महाराष्ट्रात सायबर फसवणुकीतून २,११९.६९ कोटी रुपयांचे नुकसान झाले आहे. दररोज सरासरी ८.७२ कोटी रुपयांची सायबर लूट होत आहे. सायबर पोलिसांच्या प्रयत्नांमुळे केवळ ५८७.४० कोटी रुपये वाचवण्यात यश आले आहे. म्हणजेच एकूण फसवणुकीच्या रकमेपैकी केवळ २७.७१ टक्के रक्कम वाचवता आली, तर नागरिकांचे तब्बल १,५३२.२९ कोटी रुपयांचे नुकसान झाले आहे.
आकडेवारी काय सांगते
३१ ऑगस्ट २०२६ पर्यंत सायबर पोलिसांकडे २ लाख ८ हजार ७६७ तक्रारी दाखल झाल्या आहेत. गेल्या वर्षी म्हणजेच २०२५ मध्ये २ लाख ८४ हजार २८१ तक्रारी नोंदवण्यात आल्या होत्या आणि त्यात ३,५३६.४२ कोटी रुपयांची फसवणूक झाली होती. २०२५ मध्ये ६१७.५२ कोटी रुपये वाचवण्यात यश आले होते. ही आकडेवारी सायबर गुन्ह्यांचा विळखा किती मोठा आहे, हे स्पष्ट करते.
फसवणूक कशी होते आणि काय करावे
यूपीआय, क्रेडिट कार्ड, बनावट कस्टमर केअर, फेक गुंतवणूक आणि लॉटरीच्या माध्यमातून फसवणूक केली जात आहे. फिशिंग, रॅन्समवेअर, आधार-पॅनचा गैरवापर आणि ऑनलाइन शॉपिंग स्कॅमद्वारे नागरिकांना लक्ष्य केले जात आहे. सोशल मीडियावर बनावट प्रोफाइल, सायबर स्टॉकिंग, धमकी आणि ब्लॅकमेलिंगचे प्रकारही समोर येत आहेत. बँकिंग व्यवहारातील वेगामुळे सायबर गुन्हेगारांकडून काही मिनिटांत पैसे दुसऱ्या खात्यांत वर्ग केले जातात. सायबर फसवणूक रोखण्यासाठी महत्त्वाचा मानला जाणारा गोल्डन अवरही निष्प्रभ ठरत आहे. सायबर फसवणूक झाल्यास तातडीने १९३० या हेल्पलाइनवर संपर्क साधण्याचे आवाहन करण्यात आले आहे.
स्रोत: मूळ बातमी
Leave a Reply