दिवाळीच्या काळात क्षमतेपेक्षा अधिक प्रवासी आणि माल वाहतूक करणाऱ्या काही खासगी आराम बसवर कर्नाटक प्रादेशिक परिवहन विभागाने कारवाई केली आहे. दिवाळीत प्रवाशांची संख्या मोठी असल्यामुळे क्षमतेपेक्षा अधिक प्रवासी वाहतूक केली जात असल्याचे वारंवार दिसून येत होते. त्यामुळे विभागाने ठिकठिकाणी आराम बसची तपासणी करून माहिती घेतली.
तिकीट दर दुप्पट-तिप्पट
दिवाळी निमित्ताने बेळगावला परतणाऱ्या आराम बसच्या तिकीट दरात दुपटीने वाढ करण्यात आली होती. विशेषतः मुंबई, पुणे, बेंगळूर, हैदराबाद आणि मंगळूर या शहरांतून बेळगावला येण्यासाठी दुप्पट ते तिप्पट तिकीट दर आकारला जात होता. त्यामुळे बऱ्याच प्रवाशांनी तक्रारीही दाखल केल्या होत्या. रेल्वे आणि परिवहन मंडळाच्या आराम बसचे तिकीट बुकिंग भरलेले असल्याने खासगी ट्रॅव्हल चालकांनी प्रवाशांची आर्थिक पिळवणूक केली.
गर्दीचा फायदा घेत इतर मार्गांच्या खासगी ट्रॅव्हल्स बेळगाव मार्गावर वळविण्यात आल्या होत्या. त्यामुळे या ट्रॅव्हल्समधून क्षमतेपेक्षा अधिक प्रवासी भरले जात असल्याचे दिसून आले. काही ठिकाणी सामान ठेवण्यासाठी असलेल्या बसच्या खालील भागात प्रवासी बसवून आणल्याचे प्रकारही उघड झाले आहेत. त्याचबरोबर मोठ्या प्रमाणात मालवाहतूक केली जात असल्याने हा प्रवाशांच्या जीवाशी खेळ नाही का, असा प्रश्न उपस्थित करण्यात येत होता.
राज्यभर मोहीम, दंडात्मक कारवाई
कर्नाटक प्रादेशिक परिवहन विभागाकडून संपूर्ण राज्यभर दिवाळीच्या काळात मोहीम राबविण्यात आली. या मोहिमेद्वारे ट्रॅव्हल्समधून वाहतूक करणाऱ्या प्रवाशांची संख्या, मालाची क्षमता यासह वाहनांची कागदपत्रे आणि चालकाचा वाहन परवाना याची तपासणी करण्यात आली. यामध्ये काही ट्रॅव्हल्सवर दंडात्मक कारवाई करण्यात आली आहे.
सणासुदीच्या काळात प्रवाशांची गर्दी वाढते, तेव्हा खासगी वाहतूकदारांकडून अशा प्रकारची अतिरिक्त वाहतूक केली जाते. त्यामुळे प्रवाशांच्या सुरक्षेचा प्रश्न निर्माण होतो. विभागाने केलेल्या या कारवाईमुळे अशा प्रकारांना आळा बसेल, अशी अपेक्षा व्यक्त होत आहे.
स्रोत: मूळ बातमी
Leave a Reply