गेल्या काही दिवसांपासून सुरू असलेल्या न्यायालयीन लढाई, शासन नियुक्त सदस्यांच्या सहभागावरून निर्माण झालेला वाद आणि राजकीय आरोप-प्रत्यारोपांच्या नाट्यमय घडामोडींनंतर अखेर गोकुळ दूध संघाच्या अध्यक्षपदाचा फैसला झाला आहे. महायुतीचे उमेदवार आणि राष्ट्रवादी काँग्रेसचे माजी आमदार राजेश पाटील यांनी १६ विरुद्ध १३ मतांनी विजय मिळवत अध्यक्षपदावर बाजी मारली. त्यांनी समविचारी आघाडीचे उमेदवार शशिकांत पाटील-चुयेकर यांचा पराभव केला.
शासन नियुक्त सदस्यांचे प्रथमच मतदान
विशेष म्हणजे, गोकुळच्या इतिहासात प्रथमच शासन नियुक्त चार सदस्यांनी अध्यक्ष निवडीच्या प्रक्रियेत मतदानाचा हक्क बजावला. उच्च न्यायालयाच्या कोल्हापूर सर्किट बेंचच्या आदेशानुसार मंगळवारी, दहा तारखेला गोकुळ शिरगाव येथील प्रधान कार्यालयात अध्यक्ष निवडीची प्रक्रिया पार पडली. करवीरच्या प्रांताधिकारी तथा अध्यासी अधिकारी मोसमी चौगुले यांच्या अध्यक्षतेखाली सकाळी अकरा वाजता सभेला सुरुवात झाली. सभेला सर्व संचालक उपस्थित होते.
सभेच्या प्रारंभी नवनिर्वाचित संचालक अभिजित तायशेटे, बयाजी शेळके आणि किसन चौगले यांनी शासन नियुक्त चार संचालकांच्या उपस्थितीवर आक्षेप घेतला. मात्र, उच्च न्यायालयाचा नऊ नोव्हेंबरचा आदेश तसेच जिल्हा सहकारी निवडणूक अधिकारी आणि सरकारी अभियोक्त्यांनी दिलेल्या स्पष्टीकरणाच्या आधारे शासन नियुक्त सदस्यांना सभेत सहभागी होण्याची परवानगी असल्याचे अध्यासी अधिकाऱ्यांनी स्पष्ट केले.
पाच हजार कोटी रुपयांपेक्षा अधिक वार्षिक उलाढाल असलेल्या सहकारी संस्थांवर पाच शासन नियुक्त सदस्य नेमण्याचा निर्णय राज्य सरकारने नुकताच घेतला आहे. यातील एका अधिकाऱ्याला मतदानाचा अधिकार नसून उर्वरित चार तज्ञ सदस्यांना मतदानाचा अधिकार देण्यात आला आहे. त्यानुसार या चार सदस्यांनी प्रथमच गोकुळच्या अध्यक्ष निवडीत मतदान केले. त्यामुळे निवडून आलेले २५ संचालक आणि चार शासन नियुक्त सदस्य अशा एकूण २९ जणांच्या मतदानाने अध्यक्ष निवड निश्चित झाली.
१६ विरुद्ध १३ मतांनी विजय
गणपूर्ती जाहीर झाल्यानंतर अध्यक्षपदासाठी राजेश पाटील आणि शशिकांत चुयेकर यांनी उमेदवारी अर्ज दाखल केले. छाननीत दोन्ही अर्ज वैध ठरल्यानंतर माघारीसाठी वेळ देण्यात आला. मात्र, दोन्ही उमेदवार निवडणूक रिंगणात कायम राहिल्याने गुप्त मतदान घेण्यात आले. न्यायालयाच्या आदेशानुसार निवडून आलेले संचालक आणि शासन नियुक्त सदस्य यांच्या मतांची स्वतंत्र मोजणी करण्यात आली. अखेर राजेश पाटील यांना १६, तर चुयेकर यांना १३ मते मिळाली. अध्यासी अधिकारी मोसमी चौगुले यांनी राजेश पाटील यांची अध्यक्षपदी निवड झाल्याचे जाहीर केले. यामुळे गोकुळच्या सत्तासंघर्षात महायुतीने निर्णायक विजय मिळवला.
स्रोत: मूळ बातमी
Leave a Reply