जळगावचे पालकमंत्री गुलाबराव पाटील यांनी रविवारी धरणगाव तालुक्यातील पोखरी बंजारा तांड्यात ग्रामस्थांसोबत दिवाळी साजरी केली. दुष्काळाचे सावट असतानाही आपुलकीने सण साजरा करत त्यांनी बंजारा समाजातील महिला, वडीलधारी मंडळी आणि लहान मुलांसोबत वेळ घालवला. कोणताही शासकीय थाट किंवा औपचारिकता न ठेवता ते ग्रामस्थांच्या सुखदुःखात सहभागी झाले.या भेटीमुळे तांड्यातील ग्रामस्थांचा दिवाळीचा उत्साह वाढला.
पारंपरिक स्वागत आणि एकाच पंगतीत फराळ
तांड्यात आगमन होताच पारंपरिक वेशभूषेतील महिलांनी औक्षण करून त्यांचे स्वागत केले. यावेळी महिला व पुरुषांनी बंजारा आणि पावरा गीतांवर पारंपरिक नृत्य सादर केले. गीत-संगीत आणि नृत्यातून बंजारा संस्कृतीचे दर्शन घडले. पालकमंत्री म्हणून नव्हे, तर कुटुंबातील सदस्याप्रमाणे ग्रामस्थांसोबत एकाच पंगतीत बसून त्यांनी दिवाळी फराळाचा आस्वाद घेतला. त्यांच्या या साधेपणाचे ग्रामस्थांनी स्वागत केले.
शेतकऱ्यांच्या अडचणी आणि मदतीची ग्वाही
यावेळी शेतकऱ्यांनी कमी पावसामुळे शेतीचे नुकसान झाल्याने निर्माण झालेल्या आर्थिक अडचणी मांडल्या. शासनाने जाहीर केलेल्या पाच हजार रुपयांच्या अग्रीम मदतीव्यतिरिक्त आणखी मदत मिळावी, अशी अपेक्षा त्यांनी व्यक्त केली. त्यावर शासन शेतकऱ्यांच्या पाठीशी असून त्यांना नक्कीच मदत करेल, अशी ग्वाही गुलाबराव पाटील यांनी दिली. दुष्काळामुळे ग्रामीण भागातील अनेक कुटुंबे अडचणीत आहेत. अशा वेळी आपल्या माणसांच्या सुखदुःखात सहभागी होणे महत्त्वाचे आहे. पोखरी तांड्यातील माता-भगिनी, वडीलधारी मंडळी आणि चिमुकल्यांसोबत दिवाळी साजरी करताना आपल्याच कुटुंबात सण साजरा केल्याचे समाधान मिळाल्याची भावना पालकमंत्र्यांनी व्यक्त केली.
या कार्यक्रमाला प्रताप पाटील, सरपंच गोकुळ शिंदे, उपसरपंच नवल पारधी, सदस्य महेंद्र पाटील, संतोष वंजारी, किसन राठोड, रामलाल चव्हाण, इंदल चव्हाण, धनराज राठोड, गुलाब चव्हाण, पांडुरंग चव्हाण, हिरालाल चव्हाण, ताराचंद चव्हाण, गोविंदा सोनवणे यांच्यासह शिवसेना व युवासेनेचे पदाधिकारी, कार्यकर्ते, बंजारा समाजातील महिला, युवक आणि ग्रामस्थ मोठ्या संख्येने उपस्थित होते.
स्रोत: मूळ बातमी
Leave a Reply