दिवाळी आली की नोकरी करणाऱ्या प्रत्येकाला बोनसची उत्सुकता असते. कुणाला मिठाईचा बॉक्स मिळतो, तर कुणाच्या हाती भेटवस्तू येते. मात्र सूरत येथील एका कापड व्यापाऱ्याने आपल्या कर्मचाऱ्यांना दिलेला बोनस सध्या सोशल मीडियावर चर्चेचा विषय बनला आहे. या व्यापाऱ्याने प्रत्येक कर्मचाऱ्याला एक लाखांहून अधिक रक्कम बोनस म्हणून दिली आहे.
ताटांत नोटा सजवून बोनस
गुजरातमधील सूरतच्या मोटा वराछा परिसरातील सुदामा चौकात महादेव क्लॉथ सेंटर हे दुकान आहे. या दुकानाचे मालक रामस्वरूप मुंडे यांनी यंदाच्या दिवाळीत आपल्या वीस कर्मचाऱ्यांना खास भेट देण्याचे ठरवले. त्यांनी प्रत्येक कर्मचाऱ्याला एक लाखांहून अधिक रक्कम बोनस म्हणून दिली.
बोनस देण्याची पद्धतही तितकीच खास होती. पूजेसाठी वापरल्या जाणाऱ्या ताटांमध्ये दहा, वीस, पन्नास, शंभर, दोनशे आणि पाचशे रुपयांच्या नोटांच्या गड्ड्या सजवण्यात आल्या होत्या. काही कर्मचाऱ्यांना त्यांच्या पत्नीच्या हाती बोनस देण्यात आला. नोटांनी भरलेले ताट समोर आल्यावर कर्मचाऱ्यांना काही क्षण विश्वासच बसेना.
कर्मचारी भावूक का झाले
वर्षभर केलेल्या मेहनतीचे असे मोठे बक्षीस मिळाल्याने अनेक कर्मचारी भावूक झाले. काहींनी मालकाचे पाय धरले, तर काही महिलांना रडू कोसळले. कर्मचाऱ्यांनी मालकाचे आभार मानले आणि त्यांचे आशीर्वादही घेतले. कर्मचाऱ्यांना नोटांनी भरलेली ताटे देतानाचा व्हिडिओ सोशल मीडियावर व्हायरल झाला आहे.
मालकाची भूमिका
मालकाच्या म्हणण्यानुसार, दुकानात काम करणारे लोक केवळ कर्मचारी नसून त्यांच्या कुटुंबाचाच एक भाग आहेत. वर्षभर त्यांच्या मेहनतीमुळे व्यवसाय पुढे जातो. त्यामुळे दिवाळीसारख्या सणाला त्यांच्या घरात पैशांची कमतरता भासू नये आणि त्यांनाही आपल्या कुटुंबासोबत आनंदाने सण साजरा करता यावा, या विचारातून त्यांनी हा बोनस दिला. हा व्हिडिओ पाहून अनेकजण व्यापाऱ्याचे कौतुक करत आहेत आणि अशा मालकाकडे नोकरी मिळाली तर किती छान होईल, अशा प्रतिक्रियाही देत आहेत.
स्रोत: मूळ बातमी
Leave a Reply