सातारा जिल्ह्यातील कोंढवली गावच्या नळ पाणीपुरवठा योजनेसाठी ८४ लाख ९३ हजार २८२ रुपयांच्या अंदाजपत्रकाला विशेष बाब म्हणून सुधारित प्रशासकीय मान्यता देण्यात आली आहे. धोम प्रकल्पांतर्गत कोंढवली (लिंब) या पुनर्वसित गावठाणातील या योजनेसाठी सार्वजनिक बांधकाममंत्री शिवेंद्रसिंहराजे भोसले आणि मदत व पुनर्वसन मंत्री मकरंद पाटील यांच्या पाठपुराव्यामुळे ही मान्यता मिळाली आहे. यामुळे भरीव निधी उपलब्ध झाला असून कोंढवली येथील पाणीटंचाईचा प्रश्न सुटणार आहे. याबद्दल कोंढवली ग्रामस्थांनी दोन्ही मंत्र्यांचे आभार मानले आहेत.
आधीचा निधी अपुरा पडला होता
कोंढवली या पुनर्वसित गावठाणातील नळ पाणीपुरवठा योजना या नागरी सुविधा कामाच्या २४.८५ लाख रुपयांच्या अंदाजपत्रकाला पुणे विभागीय आयुक्त यांनी यापूर्वी प्रशासकीय मान्यता देऊन हा निधी वितरित केला होता. मात्र या निधीमधून सदर योजनेचे काम पूर्ण होऊ शकले नाही. त्यामुळे या गावातील पाणीपुरवठा योजनेच्या उद्भवास पाणी कमी पडत असून तीव्र पाणीटंचाई निर्माण झाली होती. पाणीपुरवठा योजना पूर्ण करून पाणीपुरवठा सुरळीत करण्यासाठी या कामासाठी सुधारित प्रशासकीय मंजुरी मिळून निधी उपलब्ध करून देण्याची मागणी ग्रामस्थांनी मंत्री भोसले आणि मंत्री पाटील यांच्याकडे केली होती.
त्यांच्या सूचनेनुसार कार्यकारी अभियंता यांनी प्रस्ताव विभागीय आयुक्त (पुणे) यांच्याकडे सादर केला होता. त्यांच्या पाठपुराव्यामुळे राज्याच्या मदत व पुनर्वसन विभागाने कोंढवली लिंब येथील नळ पाणीपुरवठा योजनेच्या ८४ लाख ९३ हजार २८२ रुपयांच्या अंदाजपत्रकाला विशेष बाब म्हणून सुधारित प्रशासकीय मान्यता दिली आहे.
स्रोत: मूळ बातमी
Leave a Reply