जिल्हा बँक निवडणूक: १८ जागांसाठी ३०९ उमेदवार रिंगणात

जळगाव जिल्हा मध्यवर्ती बँकेच्या निवडणुकीत बुधवारी एकाही उमेदवाराने माघार घेतली नाही. तीन उमेदवार बिनविरोध झाल्यानंतर आता १८ संचालकपदांसाठी ३०९ उमेदवार निवडणूक रिंगणात आहेत. माघारीसाठी १७ नोव्हेंबरपर्यंत मुदत असून १८ नोव्हेंबरला सकाळी अकरा वाजता उमेदवारांची अंतिम यादी प्रसिद्ध करून चिन्हवाटप होणार आहे. त्यामुळे कोण कोण माघार घेतो, याकडे सहकार क्षेत्राचे लक्ष लागून आहे.

दाखल झालेल्या ४०२ उमेदवारी अर्जांपैकी छाननीत ९३ अर्ज बाद झाले आणि ३०९ उमेदवारांचे अर्ज वैध ठरले. यामुळे पालकमंत्री गुलाबराव पाटील, केंद्रीय राज्यमंत्री रक्षा खडसे आणि आमदार मंगेश चव्हाण यांच्यासमोर आव्हान कायम आहे. अर्ज छाननीत संचालकपदाच्या दहा वर्षांच्या अटीमुळे चेअरमन संजय पवार आणि आमदार अनिल पाटील यांचे अर्ज बाद झाले, तर विविध कारणांमुळे पाचोरा मतदारसंघाचे आमदार किशोर पाटील यांचे पुत्र सुमीत पाटील यांचे अर्जही बाद झाले.

मतदारसंघनिहाय लढत

मुक्ताईनगर मतदारसंघात केंद्रीय राज्यमंत्री रक्षा खडसे, देवयानी चंद्रकांत देशमुख, विनोद तराळ आणि एकनाथ खडसे यांचे स्वीय सहाय्यक योगेश कोलते यांच्यासह चार उमेदवार रिंगणात आहेत. जामनेरमध्ये मंत्री गिरीश महाजन आणि भाजप पदाधिकारी तुकाराम निकम यांचे अर्ज कायम आहेत. निकम हे महाजनांचे समर्थक मानले जातात, त्यामुळे दोघांपैकी एकाची माघार होण्याची शक्यता आहे. चाळीसगावमध्ये आमदार मंगेश चव्हाण आणि मावळते संचालक प्रदीप देशमुख यांच्यासह सात उमेदवार आहेत. जळगाव मतदारसंघात पालकमंत्री गुलाबराव पाटील, विद्यमान संचालिका जयश्री महाजन, शिवसेनेचे जिल्हाप्रमुख कुलभूषण पाटील आणि प्रभाकर सोनवणे रिंगणात आहेत. रावेरमध्ये नऊ, चोपड्यात नऊ, यावलमध्ये सहा, धरणगावमध्ये चार, अमळनेरमध्ये दोन, भडगावमध्ये चार आणि बोदवडमध्ये तीन उमेदवार आहेत.

राखीव प्रवर्गातही मोठी चुरस

इतर मागासवर्ग प्रवर्गात सर्वाधिक ५३ अर्ज वैध ठरले आहेत. यात मावळते संचालक डॉ. सतीश पाटील, प्रताप पाटील, उदय पाटील, राजेश पाटील, माजी नगराध्यक्ष पांडुरंग काळे, माधुरी अत्तरदे आणि विष्णू भंगाळे यांचा समावेश आहे. इतर सहकारी संस्था मतदारसंघात ४५, महिला प्रतिनिधी मतदारसंघात ४२, विमुक्त जाती, भटक्या जमाती व विशेष मागास प्रवर्गात ३१ आणि अनुसूचित जाती-जमाती प्रवर्गात आठ उमेदवार रिंगणात आहेत.

बिनविरोध झालेले उमेदवार

माजी आमदार चिमणराव पाटील यांच्या पत्नी नलिनी पाटील, आमदार अमोल पाटील यांच्या पत्नी मृणाल पाटील आणि मंत्री संजय सावकारे यांच्या पत्नी रजनी सावकारे यांचा बिनविरोध होण्याचा मार्ग मोकळा झाला आहे. पाचोरा मतदारसंघात भाजपचे सतीश परशुराम शिंदे हेही एकमेव उमेदवार आहेत.

स्रोत: मूळ बातमी