दिवाळीच्या तोंडावर उल्हासनगर महापालिकेतील कर्मचाऱ्यांच्या बोनसचा वाद आता चांगलाच पेटला आहे. अवघ्या ५०० रुपयांची वाढ करून कामगारांच्या तोंडाला पाने पुसल्याचा आरोप कामगार संघटनांनी केला आहे. २५ हजार रुपयांच्या बोनससाठी ५ नोव्हेंबरला महापालिकेवर धडक मोर्चा काढण्याचा इशारा कामगार नेते चरणसिंग टाक आणि सचिव राजेंद्र अडांगळे यांनी दिला आहे. त्यामुळे प्रशासनाची डोकेदुखी वाढण्याची शक्यता आहे.
दिवाळी सानुग्रह अनुदानावरून प्रशासन आणि कामगार संघटना यांच्यातील संघर्ष चिघळला आहे. महापौर अश्विनी निकम यांच्या मध्यस्थीनंतर १८ हजार ५०० रुपयांचा बोनस जाहीर करण्यात आला. मात्र, अवघ्या ५०० रुपयांच्या वाढीमुळे कामगारांमध्ये तीव्र नाराजी पसरली आहे. अखिल भारतीय सफाई मजदूर युनियनचे राष्ट्रीय अध्यक्ष चरणसिंग टाक आणि राजेंद्र अडांगळे यांनी महापौर, उपमहापौर, आयुक्त आणि स्थायी समिती सभापतींना पत्र दिले आहे. या पत्रात ५ नोव्हेंबरला दुपारी १२ वाजता महापालिकेच्या मुख्य प्रवेशद्वारावर मोर्चा काढण्याचा इशारा देण्यात आला आहे.
प्रशासनाचा प्रस्ताव विरुद्ध संघटनांची मागणी
महापालिकेची आर्थिक परिस्थिती बिकट असल्याचे सांगत प्रशासनाने सुरुवातीला १८ हजार रुपयांचा प्रस्ताव ठेवला होता. मात्र, कामगार संघटना २५ हजार रुपयांच्या मागणीवर ठाम आहेत. महापौरांच्या मध्यस्थीनंतर जाहीर झालेली १८ हजार ५०० रुपयांची रक्कम संघटनांना मान्य नाही.
अतिरिक्त कामांवर बहिष्काराचा इशारा
वर्षभर शहराच्या स्वच्छतेसह अत्यावश्यक सेवा देणाऱ्या कर्मचाऱ्यांच्या कष्टांचा अवघ्या ५०० रुपयांची वाढ करून अपमान करण्यात आला आहे, असे संघटनांचे म्हणणे आहे. दिवाळीनंतर नियमित कामकाजाच्या वेळेबाहेर कोणतीही अतिरिक्त कामे केली जाणार नाहीत, असा इशारा देण्यात आला आहे. स्वच्छ भारत अभियानाच्या पथकांच्या भेटीदरम्यानही अतिरिक्त कामांवर बहिष्कार टाकण्याचा इशारा देण्यात आला आहे. त्यामुळे बोनसचा वाद आणखी चिघळण्याची चिन्हे असून, प्रशासनापुढे कामगारांची नाराजी दूर करण्याचे आव्हान उभे ठाकले आहे.
स्रोत: मूळ बातमी
Leave a Reply