सोन्याच्या किमतींवरून राज्याच्या राजकारणात नवी चर्चा सुरू झाली आहे. परिवहन मंत्री प्रताप सरनाईक यांनी सोन्याच्या भावांबाबत केलेल्या विधानाने लक्ष वेधले आहे. आंतरराष्ट्रीय बाजारात सोन्याची खरेदी मोठ्या प्रमाणावर होत असल्यामुळे किमती वाढल्या होत्या, असे त्यांनी सांगितले. पंतप्रधानांनी केलेल्या आवाहनानंतर मात्र चित्र बदलल्याचे त्यांचे म्हणणे आहे.
पंतप्रधानांच्या आवाहनानंतर भाव घसरले
पंतप्रधानांनी जनतेला आवाहन केल्यानंतर सोन्याच्या किमतीत जवळपास ३० ते ४० हजार रुपयांची घसरण झाली, असा दावा सरनाईक यांनी केला. कालच पंतप्रधानांनी देशातील जनतेचे आभार मानले होते, कारण त्यांनी आवाहनाला प्रतिसाद देत सोन्याची खरेदी केली नाही. जागतिक पातळीवर सोन्याचे भाव कमी झाल्याने त्याचा फायदा देशातील जनतेलाही होत आहे, असे ते म्हणाले.
काही गोष्टी अशा असतात की, ज्यावेळी पंतप्रधान जनतेला आवाहन करतात आणि त्यावेळी त्यांच्या आवाहनाला प्रतिसाद देऊन काही गोष्टी केल्या तर त्याची चांगली प्रचिती येते, असे सरनाईक म्हणाले. कोरोना काळातही पंतप्रधानांनी असेच आवाहन केले होते आणि त्यामुळे कोरोना नियंत्रणात आणण्यास मदत झाली, हे आपण सगळे जाणतो, असे त्यांनी नमूद केले.
नोटाबंदीच्या काळातही अशाच प्रकारचे आवाहन करण्यात आले होते. त्याचाही फायदा जनतेला झाला आणि भारतीय अर्थव्यवस्थेत सुधारणा झाली, असे सरनाईक म्हणाले. जागतिक पातळीवरही भारतीय अर्थव्यवस्थेबद्दल अतिशय चांगले मत आहे. अमेरिकेचे राष्ट्राध्यक्ष डोनाल्ड ट्रम्प यांनीसुद्धा भारतीय अर्थव्यवस्थेचे कौतुक केलेले आहे, असे त्यांनी सांगितले. पंतप्रधानांच्या आवाहनाला प्रतिसाद देणे हे प्रत्येक भारतीयाचे कर्तव्य आहे, असे मला वाटते, असे सरनाईक म्हणाले.
संजय राऊत यांच्यावर जोरदार टीका
संजय राऊत यांच्यावर बोलताना सरनाईक म्हणाले की, सकाळी उठल्यावर काय बोलावे आणि कोणावर टीका करावी, हा प्रश्न राऊतांना पडलेला असतो. त्यांनी टार्गेटच ठरवलेले असते. पंतप्रधान नरेंद्र मोदी यांच्यापासून अमित शाह, मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि देशातील व राज्यातील इतर मोठ्या नेत्यांवर टीका करण्याची त्यांची सवय आहे, असे ते म्हणाले.
संजय राऊत नेहमीच विरोधकांची भूमिका चांगल्या प्रकारे बजावत असतात, असे सरनाईक म्हणाले. कोणी चांगले काम केले तरी त्यांच्यावर टीका करायची, ही त्यांची प्रवृत्तीच आहे. राऊत बोलले की, प्रत्येकी दीडशे कोटी रुपयांचा भाव सुरू आहे. राऊतसुद्धा विरोधी पक्षातील सदस्य आहेत. त्यांना दीडशे कोटी रुपये मिळाले की नाही, हेही बघावे लागेल, असे सरनाईक म्हणाले. राऊत जणू रिझर्व्ह बँकेचे गव्हर्नर असल्यासारखे कोणाला दीडशे कोटी, कोणाला पन्नास कोटी, तर कोणाला शंभर कोटी रुपये मिळाले, असे सांगत असतात, असा टोला त्यांनी लगावला.
एकनाथ शिंदे यांच्या नेतृत्वाखाली सरकार स्थापन झाले, त्यावेळीसुद्धा पन्नास कोटींचा भाव असल्याची बोंबाबोंब राऊत करत होते, तरीसुद्धा महाराष्ट्रातील सर्वसामान्य जनतेने पुन्हा एकदा सत्ता दिली, असे सरनाईक म्हणाले. ज्या ज्या वेळी राऊत अशा पद्धतीने खासदार आणि आमदारांवर आरोप करतात, त्या त्या वेळी देशात आणि राज्यात आमची सत्ता येते. त्यामुळे त्यांच्या आरोपांना किती लोक मान्यता देतात, हे त्यांच्या वक्तव्यांवरूनच स्पष्ट होते, असे ते म्हणाले.
दिवंगत नेते अजित पवार यांच्याविषयी चुकून बोलल्याचे राऊत यांनी स्वतः सांगितले आहे. त्यामुळे या विषयावर आणखी पुढे जाणे योग्य नाही, असे सरनाईक म्हणाले. एखाद्या दिवंगत नेत्याबद्दल आदरांजली आणि श्रद्धांजली वाहणे हेच आपले कर्तव्य असते. त्यामुळे त्यांच्याविषयी आणखी काही बोलू नये, असे माझे मत आहे, असे ते म्हणाले. टिपू सुलतान जयंतीबद्दल बोलताना त्यांनी म्हटले की, याबाबत त्यांना काही कल्पना नाही. परंतु राज्यामध्ये बऱ्याच ठिकाणी अशा पद्धतीने चुकीच्या जयंती आणि पुण्यतिथी साजऱ्या करण्याचे प्रकार वारंवार घडत आहेत, असे त्यांनी नमूद केले.
Leave a Reply