विधान परिषद निवडणुकीतील पराभव भाजपने गांभीर्याने घेतला आहे. मागच्या महिन्यात पदवीधर आणि शिक्षक मतदारसंघाच्या विधान परिषदेच्या पाच जागांसाठी निवडणूक झाली. त्यात भाजपला दोन ठिकाणी मोठा फटका बसला. पुणे शिक्षक मतदारसंघाचा अपवाद वगळता पदवीधर मतदारसंघाच्या दोन जागा भाजपने गमावल्या.
पुणे पदवीधर आणि नागपूर पदवीधर या जागा भाजपच्या हातून गेल्या. महायुतीला दोन तर महाविकास आघाडीने तीन जागा जिंकल्या. राज्यात आणि केंद्रात सत्ता असूनही भाजपला या जागा जिंकता आल्या नाहीत. त्यामुळे पक्षाने ही बाब खूपच गांभीर्याने घेतली आहे.
मंत्र्यांच्या कामाचे ऑडिट सुरू
भाजपचे प्रदेशाध्यक्ष रवींद्र चव्हाण यांनी निवडणुकीनंतर पक्षांतर्गत झाडाझडती घेतली आहे. निकालानंतर भाजपकडून मंत्र्यांच्या कामाचे ऑडिट सुरू करण्यात आले आहे. संबंधित जिल्ह्यांच्या पालकमंत्र्यांची प्रदेशाध्यक्षांनी कानउघडणी केली.
मंत्री म्हणून पक्ष संघटना आणि कार्यकर्त्यांना काय दिले, याचा लेखाजोखा मांडण्यास मंत्र्यांना सांगण्यात आले आहे. पुढील सात दिवसांत अहवाल सादर करून बैठकीला उपस्थित राहण्याचे आदेश पक्ष नेतृत्वाने सर्व मंत्र्यांना दिले आहेत. पक्ष संघटना सर्वोच्च असून त्यामुळेच आपण मंत्री आहोत, हे विसरू नका, असा इशाराही चव्हाण यांनी दिला आहे.
महायुतीत आरोप-प्रत्यारोप
निकालानंतर भाजप आणि एकनाथ शिंदे यांच्या शिवसेनेत आरोप-प्रत्यारोप सुरू झाले आहेत. भाजप प्रवक्ते नवनाथ बन यांनी मित्र पक्ष म्हणून शिंदे शिवसेनेकडून अपेक्षित सहकार्य मिळाले नाही, असा निशाणा साधला. सहकार्य असते तर निकाल वेगळा लागला असता, असा दावा त्यांनी केला.
एकनाथ शिंदे यांची शिवसेना पुणे शिक्षकच्या जागेसाठी आग्रही होती. पण ही जागा भाजपला सोडावी लागली. त्यामुळे पुणे शिक्षकमध्ये मैत्रीपूर्ण लढत झाली आणि शिंदे शिवसेनेने अपक्ष उमेदवाराला पाठिंबा दिला होता. पुण्यातील शिंदे शिवसेनेची मते पदवीधरमध्ये मिळाली असती तर पुण्यातील पदवीधरची जागा जिंकता आली असती, असे भाजपचे म्हणणे आहे. आता हा विषय शांत झाला असला तरी त्यामुळे महायुतीमधील विसंवाद समोर आला आहे.
Leave a Reply