कार्तिकी एकादशी म्हणजेच देव उठणी एकादशी हा हिंदू धर्मातील महत्त्वाचा सण आहे. या दिवशी भगवान विष्णूंची पूजा करून त्यांना नैवेद्य दाखवला जातो. घरांमध्ये या निमित्ताने वेगवेगळे गोड पदार्थ तयार केले जातात. नेहमीचा शिरा करण्याऐवजी यंदा काहीतरी वेगळे करायचे असेल, तर मेवा पाग हा उत्तम पर्याय आहे. सुकामेवा, शेंगदाणे आणि साखरेच्या पाकापासून तयार होणारी ही मिठाई खायला चविष्ट लागते आणि ती बनवण्यासाठी फार साहित्यही लागत नाही.
मेवा पागसाठी लागणारे साहित्य
एक वाटी शेंगदाणे, एक कप मखाने, दोन वाट्या साखर, एक कप पाणी, एक वाटी किसलेले सुके खोबरे आणि आवडीनुसार तूप एवढेच साहित्य या मिठाईसाठी लागते.
मेवा पाग बनवण्याची सोपी पद्धत
सर्वप्रथम गॅसवर कढई गरम करून त्यात शेंगदाणे घालून व्यवस्थित भाजून घ्यावेत. त्यानंतर कढईत थोडे तूप गरम करून मखाने कुरकुरीत आणि सोनेरी होईपर्यंत भाजावेत. शेंगदाणे थंड झाल्यावर हाताने चोळून त्यांची साल काढावी. मग मिक्सरमध्ये शेंगदाणे आणि मखाने जाडसर वाटून घ्यावेत. दोन्हींची अगदी बारीक पूड करू नये.
आता एका कढईत दोन वाट्या साखर आणि एक कप पाणी घालावे. त्यात एक चमचा तूप घालून मिश्रण गरम करावे. साखर पूर्ण विरघळल्यानंतर पाक एकतारी होईपर्यंत उकळवावा. पाक तयार झाल्यावर त्यात शेंगदाण्याची पूड, मकान्याची पूड आणि किसलेले सुके खोबरे घालून सर्व साहित्य व्यवस्थित मिसळून घ्यावे.
त्यानंतर एका मोठ्या ताटाला किंवा परातीत तूप लावून त्यावर तयार मिश्रण पसरवावे. सुमारे २० ते २५ मिनिटे ते सेट होण्यासाठी ठेवावे. मिश्रण घट्ट झाल्यानंतर सुरीने आवडीनुसार वड्या कापून घ्याव्यात. अशा प्रकारे घरच्या घरी चविष्ट मेवा पाग तयार होईल.
देव उठणी एकादशीच्या पूजेत भगवान विष्णूंना हा मेवा पाग नैवेद्य म्हणून दाखवता येतो. उपवास सोडल्यानंतरही ही मिठाई खाता येते. कमी साहित्यात तयार होणारा हा पदार्थ सणाच्या निमित्ताने घरातील सर्वांसाठी नक्कीच खास ठरेल.
Leave a Reply