पुण्यातील प्राणीप्रेमी आणि पाळीव प्राण्यांच्या पालकांसाठी आनंदाची बातमी आहे. पाळीव प्राण्यांसोबतचं नातं आणि त्यांच्याविषयीचं प्रेम साजरं करण्यासाठी तीन दिवसीय ‘सकाळ पेटोपिया २०२६’ महोत्सवाचं आयोजन करण्यात आलं आहे. २०, २१ आणि २२ नोव्हेंबर २०२६ या कालावधीत हा महोत्सव पार पडणार आहे. पुणेकरांना आपल्या लाडक्या पाळीव प्राण्यांसह या महोत्सवात सहभागी होता येणार आहे.
शहामृग आणि मकाऊ पोपट मुख्य आकर्षण
या महोत्सवात केवळ श्वान आणि मांजरीच नव्हे, तर शहामृग, अश्व आणि रंगीबेरंगी मकाऊ पोपटांसह विविध प्राणी-पक्षी पाहण्याची संधी मिळणार आहे. प्राणीविश्वातील विविधतेचा जवळून अनुभव घेता येणार असल्यामुळे लहान मुलांपासून मोठ्यांपर्यंत सर्वांसाठी हा महोत्सव मनोरंजनासोबतच माहितीपूर्ण अनुभव ठरू शकतो.
अश्वरोहण स्पर्धा आणि श्वान पथकाचं प्रात्यक्षिक
या महोत्सवाचं आणखी एक मोठं आकर्षण म्हणजे अश्वरोहण स्पर्धा. घोडेस्वारीची आवड असणाऱ्यांना या स्पर्धेचा अनुभव घेता येणार आहे. त्याचबरोबर पोलीस दलातील श्वान पथकाकडून विशेष प्रात्यक्षिकं सादर केली जाणार आहेत. प्रशिक्षित श्वान आपल्या कौशल्यांचं प्रदर्शन करताना पाहण्याची संधी यानिमित्ताने पुणेकरांना मिळणार आहे. ‘सकाळ पेटोपिया’ महोत्सवाचं आयोजन पुण्यातील कोथरूड येथील सूर्यकांत काकडे फार्म्स येथे करण्यात आलं आहे. २० ते २२ नोव्हेंबर २०२६ या तीन दिवसांत सकाळी १० ते दुपारी २:३० आणि संध्याकाळी ४:३० ते रात्री ८:३० या वेळेत नागरिकांना या महोत्सवाला भेट देता येणार आहे.
Leave a Reply