सोशल मीडियावर स्वतःला ‘जगातील सर्वात हवी असलेली प्रेयसी’ म्हणून ओळख करून देणारी प्रसिद्ध डच इन्फ्लुएन्सर आणि ओन्लीफॅन्स मॉडेल वेरा डाइकमन्स सध्या अमेरिकेच्या यंत्रणांच्या ताब्यात आहे. एका कार्यक्रमासाठी न्यूयॉर्कला आलेल्या वेराला विमानतळावर उतरताच अमेरिकेच्या इमिग्रेशन आणि कस्टम्स एन्फोर्समेंट (ICE) विभागाने ताब्यात घेतले.
या प्रकरणाची सुरुवात ११ नोव्हेंबर रोजी झाली. मियामीहून प्रवास करून वेरा न्यूयॉर्कच्या लिबर्टी आंतरराष्ट्रीय विमानतळावर उतरली. ती अमेरिकेत एका मोठ्या UFC कार्यक्रमात सहभागी होण्यासाठी आणि तिथल्या फायटर्ससोबत सोशल मीडियासाठी कंटेंट तयार करण्यासाठी आली होती. मात्र, विमानतळावर आधीच उपस्थित असलेल्या ICE च्या एजंट्सनी तिला तात्काळ ताब्यात घेतले आणि हातकड्या घातल्या. अमेरिकेच्या डिपार्टमेंट ऑफ होमलँड सिक्युरिटीने (DHS) तिच्या अटकेची अधिकृत घोषणा केल्यानंतर या प्रकरणाने आंतरराष्ट्रीय पातळीवर मोठे रूप धारण केले.
व्हिसा नियमांचे उल्लंघन आणि हद्दपारीचा आदेश
या कारवाईमागे व्हिसा नियमांचे उल्लंघन असल्याचे समोर आले आहे. डीएचएसने दिलेल्या माहितीनुसार, या वर्षाच्या सुरुवातीलाच एका अमेरिकन इमिग्रेशन न्यायाधीशाने वेरा डाइकमन्सला देशातून हद्दपार करण्याचा अंतिम आदेश जारी केला होता. तिच्या भूतकाळातील प्रवासावर नजर टाकल्यास, तिला सर्वप्रथम मार्च २०१९ मध्ये अमेरिकेत बेकायदेशीरपणे प्रवेश करण्याचा प्रयत्न केल्याप्रकरणी अटक करण्यात आली होती आणि त्यावेळीही तिला देश सोडण्यास सांगण्यात आले होते.
तथापि, २०२४ मध्ये तिला काही ठराविक कालावधीसाठी अमेरिकेत राहण्याची कायदेशीर परवानगी मिळाली होती. पण ठरलेल्या कालावधीपेक्षा जास्त काळ ती अमेरिकेत राहिल्याचे उघडकीस आले. ऑगस्ट २०२५ मध्ये तिच्याविरोधात हद्दपारीची कायदेशीर प्रक्रिया सुरू करण्यात आली. त्यानंतर मे २०२६ मध्ये इमिग्रेशन न्यायालयाने हद्दपारीचा अंतिम आदेश काढला, कारण वेरा न्यायालयाच्या सुनावणीसाठी हजर राहिली नव्हती.
वेरा ही मूळची बी-२ व्हिजिटर व्हिसावर अमेरिकेत आली होती. या व्हिसाअंतर्गत पर्यटनासाठी येण्याची परवानगी असते, परंतु या कालावधीत व्यावसायिक स्वरूपात काम करण्याची किंवा इन्फ्लुएन्सरसाठी शूटिंग करण्याची अनुमती नसते. वेराच्या आईने यावर स्पष्टीकरण देताना सांगितले की, तिची मुलगी सतत जगभर प्रवास करत हॉटेलमध्ये राहत असते, त्यामुळे तिला न्यायालयाची कोणतीही नोटीस वेळेवर मिळाली नसावी आणि ती सुनावणीला उपस्थित राहू शकली नाही.
कोण आहे वेरा डाइकमन्स?
वेरा डाइकमन्स ही नेदरलँड्सची एक अत्यंत लोकप्रिय डिजिटल इन्फ्लुएन्सर आणि मॉडेल आहे. इंस्टाग्रामवर तिचे तब्बल ५७ लाखांहून अधिक फॉलोअर्स आहेत, तर ओन्लीफॅन्स या सबस्क्रिप्शन प्लॅटफॉर्मवर तिचे सुमारे ८ लाख ७५ हजार सबस्क्रायबर्स आहेत.
ती जगभरात खरी चर्चेत आली ती २०२३ मधील एका घोषणेमुळे. वेरा डाइकमन्सने सार्वजनिकरीत्या सोशल मीडियावर जाहीर केले होते की, तिला तिचा बॉयफ्रेंड बनवण्यासाठी पुरुषांनी अर्ज करावा. तिची ही घोषणा वाऱ्यासारखी पसरली आणि जगाच्या कानाकोपऱ्यातून तब्बल ५,००० हून अधिक पुरुषांनी तिचा अधिकृत बॉयफ्रेंड होण्यासाठी अर्ज दाखल केले होते. मात्र, एवढे हजारो अर्ज येऊनही तिला हवा तसा योग्य जोडीदार मिळाला नाही.
नजरकैद केंद्रातील अवस्था
सध्या वेरा डाइकमन्सला न्यू जर्सीमधील डेलानी हॉल डिटेन्शन सेंटरमध्ये ठेवण्यात आले आहे. तिला ज्या परिस्थितीत ठेवण्यात आले आहे, त्यामुळे तिची प्रकृती झपाट्याने खालावत चालली असून कुटुंबीयांनी तीव्र संताप व्यक्त केला आहे. १४ नोव्हेंबर रोजी वेराच्या आईने तिची प्रत्यक्ष भेट घेतली, तेव्हा तिथली बिकट अवस्था पाहून त्यांनाही अश्रू अनावर झाले.
वेराच्या आईने माध्यमांशी बोलताना सांगितले की, तिच्या मुलीला अत्यंत अमानुष आणि कोंदट वातावरणात ठेवण्यात आले आहे. एकाच छोट्या खोलीत वेरासह इतर १२ महिला कैद्यांना डांबण्यात आले असून, त्या खोलीत ताज्या हवेची साधी सोयसुद्धा नाही. आईला पाहताच वेरा ढसाढसा रडू लागली. तिच्या दळणवळणावरही कडक निर्बंध लादण्यात आले आहेत. संपूर्ण दिवसातून तिला केवळ पाच मिनिटे फोन वापरण्याची परवानगी दिली जाते. त्या केंद्रात सुमारे ६० महिला कैद्यांसाठी केवळ चारच फोन उपलब्ध आहेत, ज्यामुळे संपर्क साधणेही कठीण झाले आहे.
Leave a Reply