सध्या सर्वत्र रामायण सिनेमाचीच चर्चा रंगली आहे. बॉक्स ऑफिसवर सिनेमा बक्कळ कमाई करत आहे. आज सलग १३ व्या दिवशीही सिनेमाची बॉक्स ऑफिसवरील पकड मजबूत असल्याचे दिसत आहे. केवळ प्रेक्षकांनीच नाही, तर सिनेमा विश्लेषकांनीही सिनेमाचे कौतुक केले आहे. आता प्रसिद्ध संगीतकार जावेद अख्तर यांनीही रामायण सिनेमाबद्दल मोठे वक्तव्य केले आहे. जावेद अख्तर यांनी अद्याप सिनेमा पाहिलेला नाही, पण सिनेमा पाहण्याची त्यांची इच्छा आहे. त्यांनी भगवान रामाबद्दल स्वतःचे विचार मांडले आहेत.
राम हे आदर्श आणि जगण्याची पद्धत
मंगळवारी पार पडलेल्या एका कार्यक्रमात जावेद अख्तर यांना नितेश तिवारी दिग्दर्शित रामायण सिनेमा पाहिला का, असे विचारण्यात आले. त्यावर जावेद अख्तर म्हणाले की, ते हा सिनेमा नक्कीच पाहणार आहेत. त्यांची मुलगी झोया हिने सिनेमा पाहिला आहे आणि तिने सिनेमाचे कौतुकही केले आहे. ती सहसा कोणत्याही गोष्टीचे कौतुक करत नाही, असेही त्यांनी सांगितले. पुढे जावेद अख्तर म्हणाले की, भगवान राम केवळ एक व्यक्ती नाहीत, तर एक आदर्श आणि जगण्याची एक पद्धत आहेत. राम हे नैतिकतेचे एक प्रतीक आहेत. प्रत्येक भारतीयामध्ये आणि त्यांच्या संस्कारामध्ये राम आहे आणि हे चित्र जेव्हा तुम्ही पाहता, तेव्हा त्याचे कौतुक करता. ही गोष्ट थेट हृदयाला स्पर्श करते.
माझे वक्तव्य अनेकांना नाराज करेल, पण…
जावेद अख्तर म्हणाले की, त्यांच्या वक्तव्यामुळे उद्या अनेक जण नाराजही होतील, पण राम यांचे विचार प्रत्येक भारतीयाच्या रक्तात भिनलेले आहेत. मग ती व्यक्ती कोणत्याही धर्माची असेल. जरी त्यांच्याकडे कधीकधी एक व्यक्ती म्हणून पाहिले जात असले, तरी त्यांचे महत्त्व त्यापेक्षा कितीतरी अधिक आहे. ते जीवन जगण्याच्या एका तत्त्वज्ञानाचे प्रतिनिधित्व करतात, असेही जावेद अख्तर म्हणाले.
याच कार्यक्रमात सोनिया गांधी यांच्या पुस्तकावरही जावेद अख्तर यांनी प्रतिक्रिया दिली. सोनिया गांधी यांचे पुस्तक ‘Belonging: A Journey of Love’ वाचण्यास त्यांनी सुरुवात केली आहे. त्यांना हे पुस्तक फार आवडले आहे. पुस्तक लिहिण्याचा अंदाज प्रचंड सुंदर आणि सरळ असल्याचे त्यांनी सांगितले. पूर्ण पुस्तक वाचून झाल्यानंतर ते याबद्दल बोलतील, असेही ते म्हणाले. त्यांच्या मनात सोनिया गांधी यांच्याबद्दल प्रचंड सन्मान आहे. मी काँग्रेसचा नसलो तरी सोनिया गांधी यांचा आदर करतो, असेही जावेद अख्तर म्हणाले.
Leave a Reply