देशातील वाढत्या महागाईचा थेट परिणाम सर्वसामान्य कुटुंबांच्या घरगुती बजेटवर होत आहे. दूध, डाळी, खाद्यतेल, भाजीपाला आणि जीवनावश्यक वस्तूंच्या किमती वाढल्या आहेत. त्यामुळे गृहिणींना घरखर्चाचे नियोजन करताना अडचणी येत आहेत. लोकांना अनावश्यक खर्चात कपात करण्यास आणि जीवनावश्यक वस्तूंची खरेदी कमी करण्यास परिस्थिती भाग पाडत आहे.
लोकल सर्कल्सने केलेल्या एका राष्ट्रीय सर्वेक्षणात असे दिसून आले आहे की, देशातील ६१ टक्के कुटुंबांचा, म्हणजेच जवळपास १० पैकी सहा कुटुंबांचा, गेल्या १२ महिन्यांत जीवनावश्यक घरगुती वस्तूंवरील मासिक खर्च २० टक्क्यांहून अधिक वाढला आहे. हे सर्वेक्षण देशभरातील ३२६ जिल्ह्यांमधील १.३४ लाखांहून अधिक ग्राहकांत करण्यात आले.
दूध, तूप आणि लोणी महागले
महागाईचा सर्वाधिक परिणाम खाद्यपदार्थांवर झाला आहे. अमूल आणि मदर डेअरीने १२ नोव्हेंबर २०२६ पासून दुधाच्या दरात प्रति लिटर २ रुपयांनी वाढ केली. चालू आर्थिक वर्षातील ही दुसरी दरवाढ आहे. कर्नाटक मिल्क फेडरेशनने नंदिनी दुधाच्या दरात प्रति लिटर ८ रुपयांनी वाढ केली आहे. पनीर आणि तूपही महागले. अमूलने तुपाच्या दरात प्रति किलो ५० रुपयांनी आणि बटरच्या दरात प्रति किलो १५ रुपयांनी वाढ केली आहे.
खर्चाच्या पद्धतीत बदल
वाढत्या किमतींमुळे कुटुंबे त्यांच्या खर्चाच्या पद्धती बदलत आहेत. सर्वेक्षण केलेल्यांपैकी ७४ टक्के लोकांनी अनावश्यक खर्चात कपात केल्याचे सांगितले, तर ५० टक्के लोकांनी सांगितले की ते पूर्वीपेक्षा मोजक्या वस्तूंची खरेदी करतात. सर्वेक्षण केलेल्या कुटुंबांपैकी ८० टक्के लोकांची इच्छा अशी आहे की, सरकारने साठेबाजी करणाऱ्यांवर आणि कृत्रिमरित्या किमती वाढवणाऱ्यांवर कठोर कारवाई करावी.
सर्वेक्षणानुसार, ७५ टक्के ग्राहकांना तूप, लोणी आणि खाद्यतेलाच्या किमतींमध्ये सर्वांत मोठी वाढ जाणवली. दरम्यान, ७३ टक्के प्रतिसादकांनी ताज्या भाज्यांच्या किमती वाढल्याचे, तर ७१ टक्के प्रतिसादकांनी तांदूळ, गहू आणि इतर धान्यांच्या किमती वाढल्याचे सांगितले. घाऊक बाजारातही महागाईचा दबाव दिसून आला. बँक ऑफ बडोदाचा अत्यावश्यक वस्तू निर्देशांक ऑक्टोबरमध्ये ११.१ टक्क्यांनी वाढला. सातत्याने वाढणाऱ्या किमतींमुळे सर्वसामान्यांसमोर खर्च आणि बचत यांचा ताळमेळ साधण्याचे आव्हान उभे राहिले आहे.
Leave a Reply