बुधवार, १८ नोव्हेंबर २०२६ ▶
वेगवान महाराष्ट्र महाराष्ट्राच्या ताज्या बातम्या

आसखेडा: विहिरीत पडलेल्या बिबट्याची वनविभागाकडून सुटका

आसखेडा येथे भक्ष्याचा पाठलाग करताना विहिरीत पडलेल्या बिबट्याची वनविभागाने यशस्वी सुटका केली. परिसरात आणखी बिबट्याचा वावर असण्याची शक्यता आहे.

आसखेडा: विहिरीत पडलेल्या बिबट्याची वनविभागाकडून सुटका

बागलाण तालुक्यातील आसखेडा येथे भक्ष्याचा पाठलाग करताना विहिरीत पडलेल्या बिबट्याची वनविभागाच्या पथकाने यशस्वी सुटका केली. वनविभागाच्या तत्परतेमुळे बिबट्याचे प्राण वाचले. मात्र, या घटनेमुळे परिसरातील शेतकरी आणि नागरिकांमध्ये भीतीचे वातावरण निर्माण झाले आहे.

आसखेडा येथील शेतकरी रविकांत बंडू कापडणीस यांच्या मालकीच्या शेतातील (गट क्रमांक ६५) विहिरीत रात्रीच्या सुमारास भक्ष्याचा पाठलाग करताना बिबट्या पडला होता. सकाळी शेतातील विद्युतपंप सुरू करण्यासाठी गेलेला सालगडी विहिरीत डोकावून पाहत असताना त्याला बिबट्या पडल्याचे दिसले. त्याने तत्काळ ही माहिती रविकांत कापडणीस यांना भ्रमणध्वनीद्वारे दिली. त्यानंतर वनविभागाला घटनेची माहिती देण्यात आली.

पिंजरा सोडून सुरक्षित सुटका

वनविभागाच्या पथकाने घटनास्थळी धाव घेतली. कर्मचाऱ्यांनी योग्य नियोजन आणि अथक प्रयत्नांच्या सहाय्याने विहिरीत पिंजरा सोडून बिबट्याची सुरक्षित सुटका केली. ही बचाव मोहीम ज्ञानेश्वर शेरमाळे, वनपरिक्षेत्र अधिकारी, ताहाराबाद प्रादेशिक यांच्या मार्गदर्शनाखाली राबविण्यात आली. या मोहिमेत वनरक्षक व्ही. डी. पवार, एस. एस. गायकवाड तसेच वनमजूर केदा भामरे, लक्ष्मण पवार, दीपक पवार आणि अनिल पवार यांनी सहभाग घेतला.

परिसरात आणखी बिबट्याचा वावर?

आसखेडा परिसरात आणखी बिबट्याचा वावर असल्याची शक्यता व्यक्त होत असल्याने शेतकरी आणि ग्रामस्थांमध्ये चिंतेचे वातावरण आहे. नागरिकांनी शेतात जाताना सतर्कता बाळगावी, असे आवाहन करण्यात येत आहे.

समृद्धी जगताप

Similar Posts

View All

Leave a Reply

Your email address will not be published. Required fields are marked *

ही वेबसाइट AI सहाय्याने व्यवस्थापित केली जाते · This website is managed with AI assistance