नांदगाव तालुक्यात शेतीत आधुनिक यंत्रसामग्रीचा वापर वाढावा आणि शेतकऱ्यांचा श्रम व खर्च कमी व्हावा, या उद्देशाने जिल्हा परिषद सेस योजना २०२६-२७ अंतर्गत कृषी साहित्य अनुदान योजना राबवली जात आहे. या योजनेतून तालुक्यातील शेतकऱ्यांना ट्रॅक्टर, रोटाव्हेटर, शेतकरी ड्रोन, कडबाकुट्टी यंत्र आणि विद्युत पंपसंच अशी विविध कृषी उपकरणे मिळणार आहेत.
गुरुवारी सोडतीने निवड
या लाभासाठी अर्ज केलेल्या शेतकऱ्यांमधून गुरुवारी, १९ तारखेला सोडत पद्धतीने लाभार्थ्यांची निवड केली जाणार आहे. नांदगाव पंचायत समितीच्या सभागृहात सकाळी ११ वाजता ही प्रक्रिया पार पडेल. कृषी अधिकारी सुरेश चौधरी तसेच कृषी विस्तार अधिकारी भटुलाल वाघ, किरण मोरे आणि निखिल सैंद्रे यांनी ही माहिती दिली.
५० टक्क्यांपर्यंत अनुदान
योजनेत विविध कृषी साहित्य आणि आधुनिक उपकरणांच्या खरेदीसाठी नियमानुसार ५० टक्के किंवा निर्धारित मर्यादेपर्यंत अनुदान दिले जाणार आहे. त्यामुळे यंत्रसामग्री खरेदी करताना आर्थिक अडचणींचा सामना करणाऱ्या शेतकऱ्यांना मोठा दिलासा मिळण्याची अपेक्षा आहे. शेतीची कामे कमी वेळेत आणि कमी मनुष्यबळात पूर्ण व्हावीत, उत्पादन खर्चात बचत व्हावी आणि आधुनिक तंत्रज्ञान ग्रामीण भागातील शेतकऱ्यांपर्यंत पोहोचावे, हा या योजनेमागील प्रमुख उद्देश आहे. विशेषतः अल्पभूधारक व अत्यल्पभूधारक शेतकरी, अनुसूचित जाती-जमाती प्रवर्गातील शेतकरी तसेच महिला शेतकऱ्यांना या योजनेत प्राधान्य दिले जाणार आहे. तालुक्यातील अनेक शेतकऱ्यांनी लाभासाठी अर्ज दाखल केले असून, आता सोडतीद्वारे निवड होणार असल्याने शेतकऱ्यांचे या सोडतीकडे लक्ष लागले आहे.
Leave a Reply