आज कृत्रिम बुद्धिमत्तेच्या जगात सर्वांत मोठे नाव असलेली एनव्हिडिया कंपनी एकेकाळी दिवाळखोरीच्या उंबरठ्यावर होती. कंपनीचे सह-संस्थापक जेन्सेन हुआंग यांनी दोन मित्रांच्या साथीने ही कंपनी उभी केली. सुरुवातीच्या अपयशानंतरही हार न मानता त्यांनी संगणक क्षेत्रात नवा बदल घडवला. गेल्या ३३ वर्षांच्या कार्यकाळात हुआंग यांनी कंपनीसाठी केलेले काम मोलाचे ठरले आहे.
छोट्या उपाहारगृहातून सुरुवात, पहिल्या चिपला अपयश
जेन्सेन हुआंग यांनी अभियांत्रिकी क्षेत्रातील दोन साथीदार ख्रिस मॅलाचोव्स्की आणि कार्टिस प्रीम यांच्या मदतीने एनव्हिडिया उभारली. संगणक क्षेत्रात बदल घडवणे आणि या क्षेत्रात नवी उत्क्रांती आणणे, हा त्यांच्या व्यवसायाचा मुख्य उद्देश होता. १९९३ मध्ये एका छोट्या उपाहारगृहातून या व्यवसायाची सुरुवात झाली. सुरुवातीच्या काळात त्यांनी तयार केलेल्या चिपला लोकांचा फारसा प्रतिसाद मिळाला नाही. अखेर कंपनी दिवाळखोरीच्या मार्गावर आली आणि परिस्थिती सावरण्यासाठी नोकरकपातही करावी लागली.
जगातील पहिला जीपीयू आणि सीयूडीएची झेप
या तिघांना खेळांच्या जगात काहीतरी वेगळे करायचे होते. १९९९ मध्ये त्यांनी जगाच्या इतिहासातील पहिले ग्राफिक प्रोसेसिंग युनिट तयार केले. जीफोर्स २५६ या जीपीयूला लोकांचा भरपूर प्रतिसाद मिळाला आणि कंपनीचा विस्तार होऊ लागला. या यशाचा मोठा फायदा कंपनीच्या समभाग विक्रीला झाला. कंपनीचे शेअर्स शेअर बाजारात १२ डॉलर प्रति शेअर दराने सूचीबद्ध झाले. २००६ मध्ये कंपनीने सीयूडीए नावाचे सॉफ्टवेअर व्यासपीठ बाजारात आणले. त्यामुळे कंपनीची उत्पादने खेळांपुरती न राहता इतर महत्त्वाच्या क्षेत्रांतही वापरली जाऊ शकतात, याची खात्री लोकांना पटली.
कृत्रिम बुद्धिमत्तेच्या पायाभरणीत मोठी भूमिका
आजचे युग कृत्रिम बुद्धिमत्तेचे आहे. तंत्रज्ञान क्षेत्रातील कंपन्या या क्षेत्रातील गुंतवणूक वाढवत आहेत. मात्र जगात कृत्रिम बुद्धिमत्तेची पायाभरणी करण्यात सर्वांत मोठे योगदान देणाऱ्या कंपन्यांच्या यादीत एनव्हिडियाचे नाव सर्वोच्च स्थानी दिसते. कृत्रिम बुद्धिमत्तेचा प्रवास साधारणतः २०१० च्या दशकात सुरू झाला. २०१२ मध्ये एका प्रतिमा ओळख स्पर्धा जिंकण्यासाठी संशोधकांनी एनव्हिडिया कंपनीची यंत्रसामग्री वापरली होती. पुढे चॅटजीपीटीसारखे तंत्रज्ञान तयार करण्यासाठी एनव्हिडियाने ओपन एआयला डीजीएक्स-१ हा महासंगणकही दिला होता. आज कृत्रिम बुद्धिमत्तेवर काम करणाऱ्या जवळपास सर्व कंपन्या संशोधनासाठी एनव्हिडियाचे चिप्स वापरतात.
Leave a Reply