सोलापूर शहरातील सार्वजनिक वाहतुकीत लवकरच मोठा बदल दिसणार आहे. केंद्र सरकारच्या पीएम-ई बस योजनेतून महापालिकेच्या परिवहन उपक्रमात वीस ई-बस दाखल झाल्या आहेत. उर्वरित ऐंशी बस मार्च महिन्यात येणार आहेत. त्याआधी बुधवार पेठेतील चार्जिंग स्टेशनचे राहिलेले काम पूर्ण केले जाणार आहे.
सध्या शहर आणि ग्रामीण भागातील जास्त प्रवासी असलेल्या मार्गांवर या ई-बस धावत आहेत. प्रवाशांना सध्या रोख रक्कम देऊन तिकीट घ्यावे लागते. मात्र डिसेंबरपासून ही पद्धत बदलणार असून डिजिटल तिकीटाची सुविधा सुरू होणार आहे.
डिसेंबरपासून स्कॅनरने तिकीट
डिसेंबरपासून प्रवाशांना पॉस मशीनवरील स्कॅनर स्कॅन करून तिकीट मिळणार आहे. त्यामुळे प्रवास करताना रोख रक्कम जवळ असावीच, असे बंधन राहणार नाही. एकदा चार्ज केल्यानंतर ई-बस १८० किलोमीटर धावते. नव्या ई-बसला जीपीएस यंत्रणा असून ती एका ॲपशी जोडली जाणार आहे. त्यामुळे प्रवाशांना मोबाईलवर बस नेमकी कोठे आहे आणि थांब्यावर यायला किती वेळ लागेल, हे समजू शकेल.
थांबेही नव्या रंगात; रिक्षांच्या अडथळ्यावर बैठक
ई-बसचा रंग भगवा असून शहरात उभारले जाणारे नवे थांबेही याच रंगाचे असणार आहेत. थांबे उभारणीचे कंत्राट एका कंपनीला दिले असून पुढील पाच वर्षे त्यांची देखभालही तीच कंपनी करणार आहे. थांब्यावर त्या मार्गावरील बसचे वेळापत्रक लावले जाणार आहे.
सध्या महापालिकेच्या उपक्रमात जुन्या सोळा बस आणि नव्या वीस ई-बस मार्गांवर धावत आहेत. मात्र बस थांब्यावर रिक्षा थांबत असल्याने प्रवाशांना अडचण होते. बस थांब्यापासून काही अंतरात रिक्षा थांबू नयेत, अशी मागणी महापालिकेने पत्राद्वारे प्रादेशिक परिवहन अधिकारी आणि शहर वाहतूक पोलिसांकडे केली आहे. या पार्श्वभूमीवर चार-पाच दिवसांत महापालिका आयुक्त, प्रादेशिक परिवहन अधिकारी आणि शहर वाहतूक शाखेच्या सहायक पोलिस आयुक्तांची बैठक होणार आहे.
परिवहन व्यवस्थापकांनी दिलेल्या माहितीनुसार, चार्जिंग स्टेशनवरील यांत्रिकी विभाग, पार्किंग आणि बसचे चार्जिंग यांची व्यवस्था उभारली जात आहे. राहिलेली कामे पुढील तीन महिन्यांत पूर्ण होतील. त्याआधी कोणत्या मार्गांवर बसची मागणी आहे आणि नव्या बस कोणत्या मार्गांवर सुरू करता येतील, याचा अंदाज घेतला जाईल.
Leave a Reply