नाशिकमध्ये क्रांतिज्योती सावित्रीबाई फुले यांच्या जीवनकार्यावर आधारित ‘कवाड’ या कादंबरीचा प्रकाशन सोहळा पार पडला. लेखक सप्तर्षी माळी यांनी लिहिलेल्या या कादंबरीचे प्रकाशन रविवारी मु. शं. औरंगाबादकर सभागृहात झाले. कार्यक्रमाच्या अध्यक्षस्थानी ज्येष्ठ ग्रामीण साहित्यिक विजयकुमार मिठे होते.
सावित्रीबाईंच्या आयुष्यातील अनेक संदर्भ आणि त्यांचा खडतर जीवनप्रवास या कादंबरीत मांडण्यात आला आहे. या कृतीने मराठी साहित्यात मोलाची भर पडल्याचे मत मिठे यांनी यावेळी व्यक्त केले. सावित्रीबाईंच्या आयुष्याचा सखोल वेध घेणारी ही कादंबरी असल्याचे त्यांनी सांगितले.
मान्यवरांची उपस्थिती
प्रकाशन सोहळ्याला भुजबळ नॉलेज सिटीच्या संचालिका डॉ. शेफाली भुजबळ, पुस्तकांचे हॉटेलच्या संचालिका भीमाबाई जोंधळे, डॉ. अश्विनी बोरस्ते, डॉ. जयश्री वाघ आणि अक्षरबंध प्रकाशनाचे प्रकाशक प्रवीण जोंधळे प्रमुख पाहुणे म्हणून उपस्थित होते. कार्यक्रमाच्या सुरुवातीला मान्यवरांच्या हस्ते ग्रंथपूजन आणि वृक्षपूजन करण्यात आले.
भीमाबाई जोंधळे यांनी यावेळी सांगितले की, प्रत्येकाने पुस्तक वाचावे आणि जगाने ज्ञानाकडे वळावे, या हेतूने त्यांनी ‘पुस्तकांचं हॉटेल’ सुरू केले. सावित्रीबाईंच्या कार्यातून आपण घडलो, असेही त्यांनी मनोगतात म्हटले. डॉ. भुजबळ यांनी ‘कवाड’ म्हणजे आधुनिक विचारांचा आणि नव्या संस्कृतीचा दरवाजा उघडणे, असे सांगितले. घरातूनच महिलांना उभारी मिळणे आणि आपले पंख विस्तारण्यासाठी संधी मिळणे, हाच सावित्रीबाईंच्या विचारांचा खरा सन्मान असल्याचे त्यांनी नमूद केले.
लेखनाचा प्रवास
लेखक सप्तर्षी माळी यांनी पुस्तक लिहिण्याचा आपला प्रवास उपस्थितांसमोर उलगडून सांगितला. रवींद्र मालुंजकर यांनी कार्यक्रमाचे सूत्रसंचालन केले, तर साई बागडे यांनी आभार मानले.
Leave a Reply