संध्याकाळी भूक लागल्यानंतर मुलांना नेहमी काहीतरी चटपटीत आणि वेगळे खायला हवे असते. सँडविच आणि बर्गर यांसारखे पदार्थ तर मुलांच्या विशेष आवडीचे असतात. अशावेळी रोज मुलांसाठी नवीन काय बनवायचे, असा प्रश्न अनेक पालकांना पडतो. तुम्हालाही संध्याकाळच्या नाश्त्यासाठी एखादी सोपी आणि चविष्ट रेसिपी हवी असेल, तर चीज ग्रील्ड सँडविच हा उत्तम पर्याय ठरू शकतो. ब्रेड, चीज आणि काही मोजक्या पदार्थांपासून हे सँडविच अगदी कमी वेळात तयार करता येते. विशेष म्हणजे लहान मुलांसोबतच घरातील मोठ्यांनाही हा टेस्टी स्नॅक्स नक्की आवडेल.
चीज ग्रील्ड सँडविचसाठी लागणारे साहित्य
हे सँडविच बनवण्यासाठी ब्रेडचे ४ स्लाइस, १ चिरलेला टोमॅटो, १ चिरलेला कांदा, १ उकळलेला बटाटा, १ चिरलेली काकडी, १ टीस्पून कोथिंबीर, अर्धा टीस्पून काळी मिरी पावडर, अर्धा टीस्पून चाट मसाला, अर्धा टीस्पून बटर, २ चमचे चीज आणि चवीनुसार मीठ लागते.
सँडविच बनवण्याची पद्धत
मुलांसाठी चीज ग्रील्ड सँडविच बनवण्यासाठी सर्वप्रथम ब्रेडवर चीज लावा. मुलांना आवडत असेल तर चीज लावण्यापूर्वी हिरवी चटणी आणि टोमॅटो सॉस सुद्धा लावू शकता. आता त्यावर कांदा, टोमॅटो, काकडी आणि बटाट्याचे स्लाइस ठेवा. यावर थोडे मीठ, काळी मिरी पावडर आणि चाट मसाला शिंपडा. आता दुसऱ्या ब्रेड स्लाइसवर चीज, हिरवी चटणी आणि सॉस लावून ही स्लाइस त्यावर ठेवा. आता सँडविच ग्रील गरम करा. ब्रेडवर बटर लावून सँडविच ग्रीलमध्ये ठेवा. सँडविच दोन्ही बाजूंनी गोल्डन ब्राऊन होईपर्यंत ग्रील करा. तुमचे टेस्टी चीज ग्रील्ड सँडविच तयार आहे. टोमॅटो सॉससोबत गरमा गरम सँडविच मुलांना सर्व्ह करा.
Leave a Reply